ميدو عادل: النجوم بيهربوا من مسرح الدولة.. والمشاركة فيه واجب وطني زي الأعمال الخيرية
علق الفنان ميدو عادل على قلة مشاركة النجوم في الأعمال المسرحية التابعة لمسارح الدولة، مؤكدًا أن هناك بعض من النجوم يتهربون من المشاركة في تلك الأعمال المسرحية.
وقال ميدو عادل خلال إحدى اللقاءات التلفزيونية: النجوم بيهربوا من مسرح الدولة عمومًا، وديه مشكلة كبيرة جدًا، ولكن فيه البعض غيرهم حابين ده، وكان فيه أساتذة كبار زي نور الشريف في عز نجوميته كان بيعمل مسرح دولة.
وأضاف: أنا شايف أن ده واجب وطني، زي ما بعمل أعمال خيرية لازم أعملها بجد وأقف جمب البلد، مش أقعد أعمل مظاهرات، وأنا مش بتاع سياسة.. هروح أعمل مسرح للدولة وهاخد فلوس أقل وده مش مهم، منا هشتغل وربنا هيكرمني في حاجات تانية.
أما عن مشاركته في مسرحية نور في عالم البحور الموجهة للطفل، أردف ميدو عادل: العرض شغال من بدري جدًا وممتد، والمسرح مليان وفيه تجاوب كبير جدًا من الأطفال.
وأكمل ميدو عادل حديثه: أنا بحب المسرح ومتفق أن الطفل مظلوم إعلاميًا وتعليميًا وفنيًا، والمسرح القومي للطفل بيقدم عروض كتير جدًا ولكن مش بيسلط الضوء عليها كويس.
تفاصيل مسرحية نور في عالم البحور
وتعد مسرحية نور في عالم البحور من إنتاج فرقة المسرح القومي للأطفال، وتُعرض على مسرح متروبول، وهي ضمن خطة العروض المسرحية للبيت الفني للمسرح، من بطولة ميدو عادل، ويشاركه التمثيل: سيد جبر، أحمد أوسكار، راندا إبراهيم، ألحان المهدي، محمد عبد الفتاح، خالد سعداوي، والمسرحية من إخراج شادي الدالي، وموسيقى وألحان هاني شنودة.
