جد الطفلة تارا ضحية والدتها مضيفة الطيران: مكانش عاجبني حديث الأم عن الطاقة الروحانية ولكن مرضتش أتدخل
كشفت التحقيقات في واقعة مقتل الطفلة تارا على يد والدتها مضيفة الطيران التونسية السابقة، والخبيرة في علم الطاقة، في القضية التي حملت رقم 7453 تفاصيل جديدة، حيث يواصل القاهرة 24 نشر التحقيقات، بعد أن زعمت المتهمة أنها تلقت إيحاءً بارتكاب جريمتها المأساوية، ثم حاولت إنهاء حياتها تنفيذا لأوامر هذا الإيحاء، ذكرت أن ما تفعله ليس أفكارا متطرفة وإنما هو علاج بالطاقة تلقته من قبل مدرسين إيطاليين وهنود.
جد الطفلة تارا ضحية والدتها مضيفة الطيران: مكانش عجبني حالها بس مرضتش أتدخل علشان مفسدش العلاقة
وقال حسن مصطفى جد الطفلة تارا ضحية والدتها مضيفة الطيران السابقة: اللي حصل إن عمرو كلمني يوم الواقعة 29 فبراير اللي فات حوالي الساعة 9.5 الصبح وبلغني إن أميرة مراته بتنتحر وقالي تعالى بسرعة يا بابا، وأنا وقتها كنت في بيتي ورحت جريت على بيت عمرو بسرعة، وطلعت البيت لقيت الشقة غرقانة دم والمطبخ مليان دم وعمرو ابني منهار من العياط، وأميرة كانت سايحة في دمها من رقبتها، وكنت مفكرها ميته لحد ما الإسعاف جات خدتها.
وأضاف حسن مصطفى جد الطفلة تارا ضحية والدتها مضيفة الطيران السابقة، لقيت سكينة عليها دم وكانت أميرة واقعة في المطبخ وغرقانة في دمها، وعمرو ابنى بلغني أنها قتلت البنت وخنقتها وبعد كده حاولت إنها تنتحر وبعدها الإسعاف جات خدت أميرة وطلعوا بيها على المستشفى، وحفيدتي تارا كانت جوا على السرير في أوضة النوم ومكنش فيها نفس، لحد ما الشرطة وجهات التحقيق جات وتاني يوم رحنا مشرحة زينهم وبعدها دفناها.
وأوضح أن مضيفة الطيران المتهمة بقتل ابنتها كانت لديها معتقدات خاصة بالعلاج الروحاني بالطاقة والتأمل، وده اللي أثر عليها ودفعها أنها تعمل كده، وهي كان كلامها معايا أنا ومراتي قليل، وعلطول منعزلة في موضوع التأمل ده، أول ما نزورها وكانت بتقول إنها عندها طاقة عالية، وكنت بلاحظ ده في الفترة الأخيرة لما كنا نزورها أو تزورنا.
وأردف: مكنتش بسمعها في اللي كانت بتقوله في فكرة العلاج بالطاقة لكن هي كانت بتقول إنه علم وعاملة فيه دراسات، ومجال شغلها الحالي في مصر، وده أنا مينفعش كنت أعترض عليه دي حاجة بينها وبين ابني وهو ومعترضش فأنا مينفعش أتدخل علشان مخربش عليهم في العلاقة الزوجية، بس ده مكانش ده عجبني علشان أنا راجل كبير وعمري مكنت هقتنع بالخرافات دي.
وأكمل: أنا مربي ولادي إن كل واحد فيهم من صغرة يكون مسؤول عن قراراته مسؤولية كاملة ومش بتدخل بينهم لأن دي خصوصية والتدخل بين الزوجين بيفسد الأمور بينهم، وهي كانت بتعامل بنتها تارا كويس وبترفض أي حد يزعقلها، وآخر مرة رحنا زورناهم كانوا عاديين جدا وكانت جيبالنا هدايا والأمور كانت طبيعية.
وكانت الدائرة 24 بمحكمة جنايات القاهرة، قررت تأجيل محاكمة مضيفة الطيران التونسية وخبيرة في علم الطاقة والروحانيات بتهمة قتل ابنتها لجلسة 17 فبراير لورود التقرير من لجنة خماسية بمصلحة الطب النفسي.
