المخرج خيري بشارة: دفنت شريهان في حفرة بجد وتعبت.. وضد جملة الماضي أفضل
سرد المُخرج خيري بشارة، مواقف وصعوبات واجهته أثناء تصوير أعماله السابقة، كما كشف رأيه في جملة فن الزمن الجميل، مشيرًا إلى إنه لكل جيل حظه ونوعية أفلامه.
وقال خيري بشارة، خلال ندوته المُقامة حاليًا بمعرض الكتاب، تحت عنوان “حياتي في السينما”، ويُديرها المخرج أحمد فوزي صالح: من الصعوبات اللي واجتها أثناء التصوير، فوجئت بكارثة، لقيت ملابس الفيلم مش كويسة ووقتها ضغطي علي عليا، وروحت السوق بنفسي أشتري اللبس، ووقتها لما عملت ده بنفسي الممثلين اتفاجئوا.
دفنت شريهان في حفرة
وأضاف خيري بشارة: مرة دفنت شريهان في الحفرة أثناء تصوير مشهد، وصممت إنها تتدفن بجد ويحطوا التراب، وقتها شريهان قالتلي حاسه إن قلبي هيقف، ولما خلصنا تصوير وشوفت نبضها عرفت إنها فعلا كانت تعبت، ولقيت نبضها ضعيف مكنتش عارف أعمل إيه.
أنا ضد جملة الزمن الجميل
وعن عبارة الزمن الجميل في الأفلام، قال خيري بشارة: أنا ضد حكاية الزمن الجميل والماضي أفضل، أنا شايف إن ممكن ما يبقاش في مجموعة بتصارع بعض عشان أفلامها، يعني في مخرجين زي أحمد فوزي صالح وغيره بيعملوا أفلام في منتهى القوة، وبياخدوا جوائز عالمية زي سامح علاء هالة لطفي وأسماء كتيرة تانية، والناس دي خدت جوائز أنا وزملائي مخدناهاش وكل جيل له حظه.
أما عن حياة خيري بشارة الشخصية، رد قائلًا: مريت بأيام مُرة في حياتي وصعبة، ومن كتر الألم مش قادر أتذكر اللي مريت بيه، وطلعت ده بالفن، زي فيلم يوم مر ويوم حلو.
