هاني خليفة: كل أفلامي بتتصنف للكبار فقط.. واستغربت نجاح فيلم رحلة 404 لأنه تقيل وعنيف
قال المخرج هاني خليفة، إن جميع أفلامه تكون مصنفة للكبار فقط وذلك منذ فيلم سهر الليالي، مؤكدًا أنه استغرب نجاح فيلمه الأخير رحلة 404 بسبب إنه فيلم يتسم بالعنف.
وقال هاني خليفة خلال لقائه مع الإعلامي عمرو أديب ببرنامج الحكاية: مفيش فيلم عملته مش للكبار فقط، وده من أيام فيلم سهر الليالي، وعندي ابن نفسي يشوف شغلي ومش عارف إزاي.. ومكنش في دماغي التصنيف العمري لفيلم رحلة 404، بس هو فعلا موضوع صعب ولا يناسب الأطفال.
وأضاف هاني خليفة مشيدًا بأداء منى زكي: أنا في رأيي إن منى زكي تقدر تقدم أي حاجة، ومن أول ما اشتغلنا في سهر الليالي وأنا بقول إنها مدهشة، ومن كتر ما المنتجين قالولنا إن الفيلم مش تجاري إحنا صدقنا ده.
هاني خليفة: استغربت نجاح فيلم رحلة 404 لأنه تقيل وعنيف
وأكمل هاني خليفة: المرادي أنا مستغرب من نجاح الفيلم لأنه تقيل وعنيف، ومش الفيلم اللي تطلع منه مبسوط، بعكس سهر الليالي كنا متوقعين نجاحه، والفيلم بيحرك حاجة بين كل واحد وبين نفسه، ولو أنا في الموقف ده هعمل ايه وهكذا.
وعن ظهور الفنانين شيرين رضا وفراج وتايسون في فيلم رحلة 404، اختتم هاني خليفة: كان فيه دعم من كل النجوم دول، وكان دعم كبير لمنى ولحفظي ولينا كلنا بس كلهم كانوا جايين يدعموا منى، وكانوا شغالين كأن الفيلم فيلمهم بجد.
