طه دسوقي يتحدث عن دور نديم في حالة خاصة: التوحد مش مرض ولا إعاقة
تحدث الفنان طه دسوقي عن كواليس مشاركته في مسلسل حالة خاصة، بشخصية نديم والتي تفاعل معها الجمهور بشكل كبير.
وقال طه دسوقي خلال لقاء له عبر منصة واتش ات، عن أكثر ما جذبه لشخصية نديم: اللي حمسني في الورق إني هجسد دور متوحد من خلال شخصية نديم، والدور ده جديد جدًا بالنسبة ليا أني أعمله كممثل، وحاجة مهمة مشوقة ليا كطه أني أعرف عنها أكتر لأن معلوماتي عنها كانت قليلة جدًا.
طه دسوقي يكشف تحضيرات مسلسل حالة خاصة
وعن التجهيز للشخصية والتحضيرات أضاف: كان أغلبه مذاكرة عن التوحد بشكل خاص، وكدور اشتغلت مع مدرب باخد معاه ورش تمثيل، لكن اشتغلت معاه بشكل خاص على المسلسل، وعملت سيرش كتير عن التوحد.
وواصل طه دسوقي تصريحاته قائلًا: معلوماتي قليلة عن التوحد، لكن المعلومات اللي جمعتها بتقول إنه طيف وحاجة كبيرة جدًا، ممكن حد تقعد مع شخص مصاب بالتوحد وتسلم عليه ومتعرفش أنه عنده توحد، وحد تاني أول ما تشوفه تعرف أن عنده توحد.
وأكمل طه دسوقي تصريحاته: يا رب يوفقني وأكون وصلت فكرة أن التوحد مش مرض ولا إعاقة، هو اختلاف في طريقة التفكير، واسمه العلمي اضطراب التوحد، وأتمنى أكون عرفت أوصلها وأنه مش إعاقة، ومش حاجة بتعطل الشخص إنه يكمل حياته بشكل جيد، هو طريقة تفكير مختلفة والاضطراب مش عقلي، لكن بيكون اضطراب في علاقة الشخص مع الناس والحاجات الاجتماعية.
وعن أكثر ما استفزه في الدور أجاب: اللي استفزني كممثل أن هو مش بيعرف يعبر عن مشاعره، ومش بيفهم مشاعر اللي قدامه، وكان فيه مشاهد كتير فيها أحاسيس، فكان الصعب بالنسبة ليا هو أني إزاي أعبر عن إحساسي.
وحقق مسلسل حالة خاصة نجاحًا كبيرًا منذ عرضه، وهو البطولة الأولى لـ طه دسوقي بجانب النجمة غادة عادل، وشارك فيه أيضًا هاجر السراج، وحسن أبو الروس، وئام وجدي وغيرهم، والعمل من تأليف مهاب طارق، وإخراج عبد العزيز النجار.
