المؤلف محمد دياسطي: فيلم درويلة موجه للشباب وطريقة تقديمه جديدة.. والعمل مع عمرو عبد الجليل ممتع
تحدث المؤلف والمنتج محمد دياسطي عن فيلم درويلة بطولة الفنان عمرو عبد الجليل ومحمود عبد المغني، حيث كشف عن فكرته، إلى جانب حديثه عن التعاون مع عمرو عبد الجليل وآيتن عامر.
وقال محمد دياسطي، في لقائه مع القاهرة 24: درويلة فيلم يعتبر موجها للشباب الصغير، والحدوتة مبنية على لوكيشن كبير أو مكان أساسي زي مسرح فيه نجوم اللي بيغني عليه بيتشهر، ولكن المسرح بيداري وراه بيزنس مش كويس لعمرو عبد الجليل، والدرويلة ليها معنيين المعنى الأول يعني لخبطة والثاني هو المكان نفسه.
وأضاف محمد دياسطي: الحكاية مختلفة في طريقة حكيها والقصة مش جديدة وهي قصة حد اتظلم وبينتقم وطريقة سرد الموضوع ودخول الموسيقى داخل الموضوع بيضيف للحكاية.
وتحدث محمد دياسطي عن التعاون مع الفنان عمرو عبد الجليل قائلًا: مش محتاج كلام، أكتر بني آدم فنان ومحترف ومش بيعمل مشاكل، وكواليسه لطيفة ودمه خفيف وكل الناس بتحبه.
وعن التعاون مع آيتن عامر قال: أول تجربة مع آيتن وما حستش بيها لأنها جاهزة دايما والدور جديد عليها وحبته وآيتن خبرة ومش محتاجة وعملت الشخصية أحلى من اللي مكتوب في الورق.
أبطال فيلم درويلة
يُشار إلى أن فيلم درويلة يشارك فيه إلى جانب عمرو عبد الجليل ومحمود عبد المغني وآيتن عامر، كل من: محمد علي رزق، حسني شتا، إبرام سمير، مسلم، لبنى ونس، نهال نور، محمد على ميزو، كابتن إبراهيم صبحي وعدد آخر من الفنانين، وهو فكرة محمد دياسطى وقصة وسيناريو وحوار لـ محمد دياسطى وعبد الرحمن فتحى وإخراج معوض إسماعيل.
