توقف الكلى والرئة│ خطأ طبي يهدد حياة شهد وائل.. وزوجها: كل دقيقة احتمالية وفاتها بتزيد
نشر نور السكري زوج شهد وائل، مقطع فيديو عبر موقع تبادل الصور والفيديوهات إنستجرام، يروي من خلاله تفاصيل تعرض زوجته شهد وائل لخطأ طبي على يد طبيب نساء وتوليد شهير، وذلك خلال خضوعها لعملية الولادة.
وقال نور السكري عبر مقطع الفيديو: مراتي كانت بتولد من أسبوعين في أحد المستشفيات بمنطقة شيراتون، مع استشاري كبير، والحمد لله ربنا رزقني، وبعدها بأسبوع جالها نزيف شديد جدًا، وكلمت الدكتور حوالي الساعة 7 الصبح وطلب مننا نقلها المستشفى، والساعة 12 الظهر فقدت الوعي وبقت جثة هامدة.
خطأ طبي فادح
وتابع: طول فترة التواجد في المستشفى لحد ما الدكتور وصل النزيف مكنش بيتوقف ومحدش في المستشفى حاول يساعدنا، وعلى ما الدكتور وصل عملنا سونار وتبين إن في أجزاء من المشيمة موجودة داخل الرحم تسببت النزيف، وده يعتبر خطأ طبي كارثي مينفعش دكتور يعمله في عملية قيصرية.
وأضاف نور السكري، زوج شهد وائل الدكتور وصل الساعة 2، وقالي ندخلها عمليات 10 دقائق بالظبط نفضي الرحم من الدم، وبعدها بساعة ونصف خرج من العمليات قالي إحنا عملنا كل حاجة والرحم مبنقبضش، ومحتاجين ندخل في جراحة نخيط شرايين الرحم، وبعده بساعتين طلع قالي إحنا لازم نشيل الرحم إما حياتها تروح.
واستكمل زوج شهد وائل: طبعًا انهرت وده كان صدمة بالنسبة لي، وخاصة إنه أول مولود لينا واحنا في أول حياتنا.. بس قلت الحمد لله وربنا رزقني خلاص، ودخل شال الرحم وكان معاه استشاري كبير وهو اللي قالنا إن اللي حصل دا بسبب خطأ طبي في عملية الولادة القيصرية، وطلع بعد كده طمنا عليها وأخبرنا إنها هتفضل 24 ساعة في العناية المركزة، قالي إنه في خلال العملية جرحوا المثانة بالخطأ بس جابوا دكتور مسالك بولية وعالج الأمر.
توقف الكلى وانخفاض كفاء القلب
وأردف نور السكري: والساعة 2 بالليل عرفوني إن الكلى توقفت ولازم تغسل، ولما سألت إمتى هتغسل قالولي بكره انشاء الله، كل ده كنا يوم التلات 30 يناير الماضي، ويوم الخميس سألتهم في المستشفى إحنا لسه مش بنغسل الكلى، قالولي أصل الأجهزة مشغولة، ويومها بالليل حصلها مشكلة في التنفس وحطوها على جهاز تنفس صناعي، وبعد 10 دقائق الجهاز علق، واتضح إنه جهاز بايظ، ولما عرضت الأمر على طبيب قريب مراتي، قالي إن كل دقيقة بتمر عليها معدل الوفاة بيزيد، والمستشفى هنا بتكذب وبتضلل عشان تداري على الدكتور، وخاصة إنهم إدوها أدوية كورتيزون وأثرت على القلب.
واختتم: نقلتها مستشفى تانية وهناك اكتشفنا إن الرئة الشمال منكمشة بشكل تام، ولما عملنا إيكو اتضح إن كفاءة القلب 20% مش 40 زي ما قالوا لنا في المستشفى الأولى، وبقالنا 5 أيام في المستشفى التانية بنغسل كلى وحطوها على جهاز التنفس الصناعي، وفي الوقت ده طلع نتيجة تحليل وتبين إنه جالها التهاب في الرحم وليست بقايا مشيمة، وأنا دلوقتي همشي بالقانون وهتبع كل الطرق القانونية عشان نجيب حقها.
