المذيعة مريم أمين ترد على منتقديها: عمري ما اتكلمت على الرجالة والستات غير بالحق.. إيه السواد ده؟
ردت المذيعة مريم أمين، على انتقادات تصريحاتها حول حث السيدات على عدم الضغط على أزواجهن في النفقات المعيشية خلال الفترة الحالية.
وقالت مريم أمين، في برنامجها اتفقنا، المذاع محطة نجوم FM: أنا عمري ما اتكلمت على الرجالة والستات غير بالحق، إحنا في بيوتنا لما كان الأب يبقى في ضيقة مادية أو التزامات الأم كانت تقول ماحدش يتكلم في فلوس دلوقتي، وكانت الست بتبقى حساسة وخايفة على جوزها.
وتابعت مريم أمين: أنا اتشتم ليه؟ ليه يقولوا اخرسي؟ إيه السواد ده؟ هو إحنا مستباحين كده ليه؟ أنا مقولتش حاجة مستفزة، وبقيت أرد ومبسوطة من نفسي إني برد، وآه هنزل لمستواك وأرد عليك، ومش معنى إننا شخصيات عامة إننا نكون مستباحين.
المذيعة مريم أمين: الستات تسكت دلوقتي.. والرجالة بخلاء غصب عنهم
وسبق وأن وجهت المذيعة مريم أمين، رسالة للسيدات في برنامجها، قائلة: الستات تركن شوية وتسكت، وما حدش ييجي ناحية الرجالة في موضوع الفلوس دلوقتي، أنتم فاهمين يعني إيه أنكم ماسكين في رقبته؟ كل راجل دلوقتي لو عنده طفل واحد الدنيا ضبابية قدامه ومش عارف هيعمل إيه، ولا عارف بكرة مستنيه إيه.
وأضافت مريم أمين: بلاش نقول بقوا بخلاء ده غصب عنهم، ولو أنتي مش بتشتغلي هيبقى كله عليه، وكلنا الأنبوبة فرقعت في وشنا.
