حسن الرداد عن سمير غانم: أسطورة الكوميديا.. وإيمي: مش بنعمل مشاكل زيه
تحدث الفنان حسن الرداد وزوجته الفنانة إيمي سمير غانم عن الفنان الراحل سمير غانم، اللذان وصفاه بأنه علامة من علامات الفن، وعامود من أعمدة السينما والكوميديا.
وقال حسن الرداد خلال المؤتمر الصحفي المقام حاليًا له ولـ إيمي سمير غانم، على هامش فعاليات مهرجان الأقصر للسينما الإفريقية: سمير غانم بغض النظر أنه حمايا، هو أسطورة كبيرة من الكوميديا وعامود من الاعمدة اللي شالت السينما على كتافها، وسمير كان له مدرسة كبيرة في الكوميديا ومدرسة الارتجال اللي كان الأول فيها.
حسن الرداد: رشدي أباظة كان بيموت من الضحك مع سمير غانم في عالم عيال عيال
وأوضح حسن الرداد: وكان يبان إنه بيعمل حاجة بسيطة ولكنها في غاية الصعوبة، وكانت كوميديا راقية وتليق بكل الناس، وعنده قدرة لو عمل مشهد واحد في فيلم ممكن تنسى الفيلم كله بس تفضل فاكر مشهده هو، زي في فيلم عالم عيال عيال، كان بيحكيلي إن رشدي أباظة كان بيموت على نفسه من الضحك ويعيديوا المشهد كتير، وكان ليا حظ إني اشتغلت معاه.
وأضاف حسن الرداد: اتعلمت منه حاجات كتيرة زي قد إيه مهم إنك تكون صادق مع الناس وتكون مكبر دماغك، وبتقدم حاجات حلوة وتفضل باقية مع الناس وده شوفناه فعلا الحب الكبير له عند الناس، هو مأثر في أجيال كتير جدا وتحس كل واحد فينا جواه سمير غانم صغير، عشان اتربينا على حاجاته وهو متوغل جوانا كلنا.
إيمي سمير غانم: أنا ودنيا مش بتوع مشاكل زي والدي ووالدتي
كما قالت إيمي سمير غانم عن والدها الراحل: هو فعلا كان معندوش مشاكل مع حد وأنا ودنيا ومامي واخدينها عنه الحتة دي، مش بنعمل مشاكل حتى لو حد بيأذينا مش بنرجع نرد أو نقول حاجة، وبسمع كتير لحد دلوقتي حب الناس وكل الأجيال بتفضل تدعيله وإنه أجمد كوميديان، وأنا كدة كدة فخورة وبابايا عندي حاجة كبيرة أوي.
