يسرا: سعيدة بنتاج مشواري الفني.. وخسرت اللي ما يستاهلونيش
تحدثت الفنانة يسرا، عن بداياتها الفنية مؤكدة أن مشوارها لم يكن سهلًا وكان هناك العديد من محطات الفشل، بجانب حديثها عن أصدقائها.
وقالت يسرا في تصريحات إذاعية: أنا رحلتي مكانتش سهلة وفيها صعوبات ونجاحات وفشل وثغرات وصعود وهبوط كتير أوي، وأنا سعيدة بالنتاج الأخير اللي أنا فيه النهاردة لأني حاسة إني مشقتش على الفاضي، بالعكس الحمد لله ربنا بيديني حب واحترام وشغل ونجاحات ومحبة الناس ودي أهم حاجة، وأكيد كل واحد عارف مكانته فين.
وتابعت يسرا متحدثة عن أصدقائها: مش كل الناس هتحبك ومش كل الناس هتكرهك، وهتلاقي أصدقاء بيحبوكي وبيدافعوا عنك مدى الحياة، وتبقي محظوظة لو عندك نوع الأصدقاء ده وغنية بيهم، لأن الصداقة الحقيقية ضهر وسند وانتي اللي بتختاريه مش مفروض عليكي، وأنا غنية بصحابي وبمساندتهم ليا وأنا بحبهم أوي، ودول الأسرة الكبيرة بتاعتي وحياتي لأني عشت معاهم أكتر ما عيشت في البيت.
وأضافت يسرا: مقدرش أشوف أخت أو صديقة أو زميلة ليا محتاجاني ومقدرش ماروحش لها، وإلهام شاهين زيي ويمكن أكتر مني بكتير، وهي عندها شهامة غير عادية.
يسرا: أنا كنت نعم الصديقة.. ولا يلدغ المؤمن من جحر مرتين
وأكدت الفنانة يسرا أنها لم تندم على خسارة أي شخص بحياتها، قائلة: أنا خسرت اللي ما يستاهلونيش، وأنا مش متضايقة خالص وأكيد هما اللي خسروني، وهما خسروني لأني كنت مخلصة ونعم الأخت والصديق، أنك تخسريني وأنتي عايزة تخسريني تبقى مشكلتك مش مشكلتي، أنا بزعل لكن بعد شوية بقول الحمد لله يا رب أنا مش تعبانة، ولكن لو سمحت مبرجعهمش زي الأول لأنه لا يلدغ المؤمن من جحر مرتين.
