شاهد عيان يروي تفاصيل مقتل شاب على يد مُسن بمنطقة دار السلام
شهدت منطقة المطبعة بدار السلام بمحافظة القاهرة، واقعة مأساوية، حيث أقدم مسن على إنهاء حياة شاب باستخدام آلة حادة "سكين"، بسبب اتهامه للمجني عليه بمعاكسة زوجته، في توقيت المباراة التي جمعت منتخب كوت ديفوار ونيجيريا.
مقتل شاب على يد مُسن بمنطقة دار السلام
وقال أحد شهود العيان لـ القاهرة 24: أن الواقعة دارت أحداثها في توقيت مباراة كوت ديفوار ونيجيريا،" الواقعة حصلت يوم الأحد حوالي الساعة 1 ونص بعد ما الماتش خلص، محمود أبو زيد كان قاعد معانا ومع ابن المتهم، فـ المتهم جه قال عايزك يا محمود في كلمتين، فـ محمود قام وأول ما وقف معاه بره القهوة المتهم كان شايل سكين في هدومه، طلع السكين وضرب محمود في صدره.
وتابع أحد شهود عيان خلال حديثة لـ القاهرة 24، قام ابنه قاله عملت ايه يابه بصوت عالي واخد منه السكينة عشان كان عايز يضربه بيها تاني ومسحها من الدم، وبعدين المتهم مشى لاخر الشارع وولع سيجارة وحاول يهرب بس الاهالي مسكته لحد اما الشرطة جات واخدته علي القسم.
وأضاف أحد شهود العيان، "قام واحد من صحاب محمود قالوا مالك، قالوا حاسس بحاجة في صدري، قام رفع الهدوم لقى محمود بينزف دم، قام حسن وعلاء أخد محمود علي الموتوسكل وطلعوا بيه على المستشفى وهما في الطريق كانوا بيقولوا قول الشهادة وحاول يسعفوه بأي طريقة بس أول ما وصلوا المستشفى كان مات.
وتابع أحد شهود العيان، أن محمود كان طيب السمعة ويتحدث 7 لغات وكان قاعد في شرم الشيخ، بس السياحة لما وقفت جه اشتغل في قهوة هنا عشان يلقط عيش، هو كان عايز يعيش بالحلال، ووالدة ووالدته متوفين واخواته قاعدين في المعادي ولما عرفوا اللي حصل قالوا خلي القانون ياخد مجراه، احنا مش هنعمل حاجة غير اننا نقول حسبنا الله ونعم الوكيل.
واختتم شاهد العيان خلال حديثة مع القاهرة 24،" محمود كان في مصحة بيتعالج من الأدمن وربنا تاب عليه ورجع يصلي واتصلح حالة، وربنا عايز ياخده نضيف وده قدر ومكتوب ليه".
