نجل محمد الحلو بعد أزمته مع المايسترو هشام جبر: عمرنا ما هنقدم حفل تاني معاه ومفيش تصالح
كشف حمادة نجل الفنان محمد الحلو، تفاصيل المشاجرة التي نشبت بينه وبين المايسترو هشام جبر في بروفات حفل والده، الأمر الذي أدى إلى اعتذار الأخير عن عدم المشاركة في حفل علي الحجار.
وقال حمادة نجل محمد الحلو في تصريح خاص لـ القاهرة 24: الأزمة كلها كانت بسبب المايسترو هشام جبر اتكلم بطريقة غير لائقة، والغريب إننا بنشوف عندنا مايسترو زي هاني فرحات وغيرهم، ماشوفناش منهم أي تكبر ولا الأسلوب الوحش ده وبيقدروا الفنانين.
حمادة الحلو: والدي عمره ما هيشارك تاني مع المايسترو هشام جبر
وتابع حمادة حديثه قائلًا: الفنان محمد الحلو عمره ما هيشارك مع المايسترو هشام جبر تاني في أي حفلة غنائية، لما كلم والدي في الطبقة الخاصة بالمزيكا ولو كان أي حد موسيقي سمع الطبقة اللي كان المفروض يغني عليها والدي كان هيموت من الضحك، وبالرغم من كده تعامل والدي معاه بذوق وعاتبه بهدوء، بالرغم أن المايسترو اتكلم بطريقة غير لائقة وعمره ما هيبقى فيه صلح بيننا.
حمادة الحلو: هشام جبر قال إني قليت أدبي عليه
وأضاف حمادة: المايسترو هشام جبر طلع وقال كلام غير صحيح وإني قليت أدبي عليه ودا محصلش، إزاي هزعق معاه، وأنا كنت بحاول أصلح الأمور مع والدي عشان كان مضايق وكاتم غضبه.
وفي سياق آخر، أصدرت دار الأوبرا المصرية مؤخرًا بيانًا بشأن اعتذار المطرب الكبير محمد الحلو عن عدم المشاركة في الحفل الأول من مشروع 100 سنة غنا.
تفاصيل اعتذار محمد الحلو عن مشروع 100 سنة غنا
وأكدت دار الأوبرا في بيانها الصحفي أن الاعتذار جاء نتيجة خلاف نشب بين المطرب الكبير محمد الحلو وقائد الأوركسترا الخاص بالمطرب علي الحجار المايسترو هشام جبر، الذي أعاد توزيع المؤلفات المقدمة في الحفل.
