المخرج عمر عبد العزيز: جيلي كله مستبعد.. ومش متصور يجيبوا ممثل قبلي في عمل
كشف المخرج عمر عبد العزيز، سبب قلة مشاركته في الأعمال الفنية خلال الفترة الماضية، مؤكدًا أن جيله بالكامل تم استبعاده من صناعة الفن.
وقال عمر عبد العزيز، في لقائه مع برنامج ET بالعربي: مش أنا لوحدي اللي مستبعد، جيلي كله مستبعد، وللأسف المعادلة بقت صعبة وهما عايزين مخرجين بيسمعوا الكلام وده مش هيحصل أبدًا.
وتابع عمر عبد العزيز: إحنا اتربينا على ده وإحنا حريصين على شغلنا ومش هيحصل إني أدخل فيلم مكتوب نصه أو مسلسل مكتوب فيه حلقتين، لا أتصور يجيبوا الممثل قبل ما يجيبوني أنا كمخرج، يبقى أنا جاي ليه؟
عمر عبد العزيز: زعلت أن خبر زواجي انتشر بالشكل ده
كما أعرب المخرج عمر عبد العزيز، عن استيائه بسبب انتشار خبر زواجه خلال الفترة الماضية، قائلًا: أنا إنسان بحب الانطواء وبعدين في سني وفرحي ألبس بدلة وأمسك ورد؟ لأ يا حبيبي كده حلو أوي، ده أنا زعلان أن الخبر انتشر بالشكل ده كان كتير، أنا بحب الخصوصية في حياتي.
وأوضح عمر عبد العزيز، أنه عاتب الإعلامية بوسي شلبي، بسبب كشفها عن خبر زواجه، قائلًا: أنا عاتبت بوسي شلبي لأننا عارفينها كويس، واللي عزمتهم أقرب الناس ليا زي ميرفت أمين ودي أخت عمري، ولبلبة وعماد رشاد، وكريم عبد العزيز والمخرج محمد ياسين ابن أختي.
