مشيرة إسماعيل تكشف سبب غيابها عن التمثيل: مخرج قالي عري كتفك وراجل هيعملك مساج وأنا محجبة!
كشفت الفنانة مشيرة إسماعيل، سبب غيابها عن التمثيل لسنوات، حيث كان آخر عمل شاركت فيه هو فيلم يوم من الأيام عام 2017، مع محمود حميدة ولطفي لبيب وهبة مجدي وإخراج محمد مصطفى وتأليف وليد يوسف.
وقالت مشيرة إسماعيل في تصريحات خاصة لـ القاهرة 24: اللي بيتعرض عليا دون المستوى وما ينفعش أقدمه، ومش شايفة أعمال ليها قيمة مش عارفة ليه كده؟.. مفيش حاجة تجذب ولا فيه عمل جماهيري، والمشكلة في الحالة الفنية وفيه حاجات بتتكتب كويس وتتنفذ وحش والعكس، وكتير بيكتبوا إني اعتزلت، ومش حقيقي، لكن اللي في سني كله قاعد في بيته لأن مفيش حاجة تنفعنا.
وأضافت مشيرة إسماعيل: واحد كلمني وعرض عليا مسلسل بقول له أنت عارف إني محجبة؟ فالمخرج اللي جمبه أو المنتج قاله قولها هتقدم مشهد هتعري فيه كتفها وراجل يعملها مساج في المستشفى.. هو ده ينفع؟ طيب أرد عليه أقوله أيه؟
وأكملت مشيرة إسماعيل: أنا وجيلي واللي قبلي قاعدين في بيوتنا والأعمال مش في المستوى اللي نشتغله، وأنا مش بتاعة إني أكلم حد ودي حاجة خارجة عن إرادتي مين ممكن في مستوانا يكلم مخرج عشان يشغله؟ اللي بيجري على الدور ويعمل أي حاجة حر ما هو الأي حاجة موجودة، لكن جيلنا اتعود على حاجة تانية.
معلومات عن مشيرة إسماعيل
تبلغ مشيرة إسماعيل من العمر 73 عامًا، إذ أنها من مواليد 26 سبتمبر 1950، بدأت مشوارها الفني بالمشاركة في السهرات التلفزيونية والفوازير، وشاركت في فوازير عمو فؤاد، التي كان يقدمها الفنان الراحل فؤاد المهندس، وحققت شهرة واسعة على مدار 5 سنوات.
ومن ثم اتجهت للسينما بعدما رشحها حسين كمال لتشارك في فيلم البوسطجي، عام 1968، وتوالت أعمالها وشاركت مع كبار النجوم إذ شاركت مع عادل إمام في فيلم إحنا بتوع الأتوبيس عام 1979، ومن ثم شاركته في مسلسل دموع في عيون وقحة عام 1980، كما قدمت معه بطولة مسرحية الواد سيد الشغال عام 1985.
