لقاء سويدان: حظي حلو وبتجوز رجالة حلوة.. وحسين فهمي راجل شرقي جدًا ومكنش بيخرجني مع أصحابي
حلت الفنانة لقاء سويدان، ضيفة على أحد البرامج التلفزيونية، وتحدثت خلال اللقاء عن تفاصيل حياتها الشخصية، وعلاقتها بطليقها الفنان حسين فهمي.
ونرصد لكم أبرز تصريحات لقاء سويدان التلفزيونية:
- ناس كتير شايفة أن صعب حد يسيطر عليا، ولكن أنا على العكس تمامًا لما أتجوز، أنا ست مطيعة جدًا لجوزي.
- لما أتحط في موقف بيبان قوتي وعندي صبر وقوة تحمل لا أحد يتخيلها، ولكن مع الراجل اللي أنا اختارته واقتنعت بيه ببقى مطيعة جدًا، وأصحابي بيتريقوا عليا أني بسمع كلام وبحترم جدًا الشخص اللي مرتبطة بيه.
- لازم هو كما يخليني احترمه، لازم يبقى هو راجل أصلا علشان احترمه، أصل الرجولة مش اسم وصوت عالي وذكورة، لأ الرجولة أني احترم عقليته وأني أحب الطريقة اللي بيتعامل معايا بيها.
- أنا حظي حلو وبتجوز رجالة حلوة، وكنت متجوزة حسين فهمي فارس أحلام البنات.
- ملفتش نظري في حسين فهمي جماله، اللي لفت نظري فيه الطريقة اللي كان بيتعامل معايا بيها، وكان بيعمل حاجات علشاني أنا مشوفتش شب في سني أو أصغر مني كان بيعملها.
- حسين فهمي كان بيحبني جدًا ودي حقيقة مقدرش انكرها، وأنا كمان حبيته جدًا، وكان بيغير عليا أكتر ما أنا بغير عليه بكتير، وأنا مكنتش بغير عليه لأني عارفة طبيعته لأني فنانة وعارفة أنه بيحترمني وطول فترة زواجنا عمره ما خاني.
- حسين فهمي راجل شرقي أوي، ومكنش بيخرجني مع أصحابي وكان له وجهة نظر أننا هنعيش بمنطق المتصاحبين اللي بيحبوا بعض ولكن في الحلال، أن يبقى عندنا نفس الشغف كأننا متصاحبين ولكن وإحنا متجوزين.
- الجواز مش عقد ملكية، والمفروض اللي جامع بينا حب مش عقد احتكار، ولو الناس فهمت ده الحياة هتمشي.
- فرق السن بيني وبين حسين فهمي 34 سنة، وأنا حرة أتجوز حد أكبر مني، طالما مبعملش حاجة تغضب ربنا ماحدش له الحق أنه يحاسبني غير أهلي.
- الرسول اتجوز ست أصغر منه بكتير وست أكبر منه بكتير علشان يعلمنا، وإحنا بنقتضي بالرسول.
