نادر حسن: جربت المخدرات.. لأن النفس أمارة بالسوء
تحدث الفنان نادر حسن، بطل فيلم العفاريت عن فترة المراهقة خلال عمله بالوسط الفني، موضحًا أنه تعاطى المخدرات ولكنه لم يدمنها، بجانب الحديث عن علاقته بـ نجله، مؤكدًا أنه نفذ وصية والده خلال تربيته لنجله.
وقال نادر حسن في حواره مع القاهرة 24: في فترة عندنا في المجال بتعيشك أكبر من سنك، وأنا في فترة الـ 15 سنة، كنت عيشت حياة اللي عندهم 21 لغاية 30 سنة، وكلنا غلطنا وأنا جربت المخدرات، وكان فيه زملائي في المجال مكنش حد من أهلهم واقف معاهم ولا بينصحهم، فمن خلال تربيتي بنصحهم وهما عايزين يعملوا بالنصيحة أو لأ لغاية ما بيحصل له موقف وبيتغير.
وتابع نادر حسن: أنا على قد ما أقدر بحاول أدي نصائح لابني واحكي له تجاربي وهو بيحكيلي، ولازم غصب عنه هيخوض التجربة، لأن النفس أمارة بالسوء، وفضوله هيوقعه مع أنه واخد نصيحة، ولكن لما يقع هيفتكر اللي اتقاله وهيعرف يقف على رجليه.
نادر حسن
سبق وكشف نادر حسن، عن وصية والده قائلًا: والدي بالنسبة ليا كان أب وصاحب وشريك وكنت بأخد رأيه في كل حاجة بعملها مات على إيديا، كان تعبان في المرحلة الأخيرة.
وأضاف نادر حسن: كان دائما يقولي صاحب ابنك ونعمة من عند ربنا النسيان، ولكن مش بنساه وفاكر لسه كل مواقفنا مع بعض لكن الواحد بيزعل على الفراق في النهاية.
