المحامي حمدي خليفة: ترشحت لانتخابات نقابة المحامين لأن أراضي النقابة اتسحبت.. وأنا مش من أنصار التكتلات
أكد حمدي خليفة المحامي بالنقض ونقيب المحامين السابق والمرشح على مقعد نقيب المحامين، أنه ترشح مرة أخرى لمقعد النقيب بعدما أعلن عام 2010 تركه العمل النقابي، بسبب سحب ¾ الأراضي المخصصة للنقابة، بجانب رفضه التكتلات داخل النقابة.
وقال حمدي خليفة، في حواره مع الإعلامي هيثم بسام، في برنامجه ورقة في ملف، المذاع عبر شاشة قناة النهار: أنا كنت في 2009 فوزت بمقعد نقيب المحامين ولم يكن لي قائمة، ودخل معايا أعضاء مصنفين أحزاب معينة يعني مجموعة فصائل، وقولت لهم إننا داخل أسوار النقابة غير خارج أسوار النقابة، يعني داخل أسوار النقابة إحنا محامين ومهنيين والكل بيخلع رداءه الحزبي، وقد كان وبالتالي اتفقنا مع بعض توافقا كان معروفا للجميع وقدرنا خلال سنتين نعمل اللي متعملش في تاريخ نقابة المحامين، وده كان من توافقنا مع بعض، وأنا مش من أنصار إن يكون في تكتلات في النقابة طالما أننا ننظر للمصلحة العامة يبقى ننظر لمصلحة نقابة المحامين، لأنها في كل الحالات أمنا اللي لازم نرعاها.
وعن سبب ترشحه لمقعد النقيب مرة أخرى، فأجاب حمدي خليفة: أنا قولت في 2010 إني أديت واجبي والتزماتي المهنية والقانونية في نقابة المحامين، وبالتالي أنا مؤمن بضرورة تداول المواقع، وده السبب اللي خلاني منزلش في الـ 3 دوارت اللي فاتت، على الرغم من أن المحامين كانوا بيتواصلوا معايا في سبيل إني أنزل الانتخابات، ولكني كنت بقول إني مؤمن بضرورة تداول المواقع.
وتابع: لكن المرة دي بالذات طبعًا بتواصل المحامين معايا على مستوى المحافظات كلها، وجدت إن البرنامج الانتخابي بتاعي اللي المفروض حد تاني ينفذه متنفذش، فقولت مفيش حل غير أن أنا أنفذ البرنامج، بل ووجدت أن الأراضي اللي أنا جبتها في 2009 وعبارة عن 20 قطعة أرض ¾ الأراضي اتسحبت ودي دلوقتي بتمثل مليارات، ودي أصول ثابتة لنقابة المحامين، ولم تكن هناك متابعة لسداد الأقساط الخاصة بها واتسحبت، ودي حاجة من الحاجات اللي خلتني أعاني نفسيًا، ورشحت نفسي للانتخابات مرة تانية.
وأضاف: وفي حاجات المفروض إنها تتعمل، يعني نص المادة 47 و48 من قانون السلطة القضائية بيوجب عند تعيين القضاة أمام محاكم ابتدائية تعيين 25 % منهم على الأقل محامين، وعند تعيين مستشارين أمام محاكم الاسئناف يتم تعيين 10% على الأقل محاميين، وأنا في 2009 كنت في أحد اللقاءات مع الرئيس مبارك وعرضت عليه هذا الأمر وكنا حريصين على تفعيل المادتين دول، وإن شاء الله ده ضمن برنامجي الانتخابي.
برنامج ورقة في ملف
الجدير بالذكر أن الإعلامي هيثم بسّام يقدم برنامج ورقة في ملف عبر شاشة قناة النهار، ويذاع البرنامج يوم الخميس من كل أسبوع في تمام الساعة الرابعة عصرًا.
