عمر عبد العزيز عن سبب غيابه: محدش بيبعت لنا شغل.. وأتمنى التعاون الفني بينا وبين المملكة يتسع|فيديو
كشف المخرج عمر عبد العزيز رئيس الاتحاد العام للنقابات الفنية، سبب غيابه خلال الفترة الأخيرة عن الساحة الفنية، كما تحدث عن أهمية التعاون الفني بين مصر والسعودية.
وعبر عمر عبد العزيز خلال حديثه مع القاهرة 24، عن استيائه من غياب بعض المخرجين والكتاب الكبار وهو منهم.
وقال عبد العزيز: أتمنى التعاون الفني بين مصر والسعودية يكون أوسع من كده، لأن ده مطلوب جدًا، هما يملكون رأس المال ونحن نملك الكفاءات، وأتمنى إن الموضوع يتسع لأكثر من حفلات غنائية ويكون نشاطا ثقافيا فنيا، وبصفتي مخرجا ورئيس الاتحاد العام للنقابات الفنية أطمع في تعاون سينمائي من أجل رفع مستوى الفيلم المصري، خاصة أنه من مدة ليس في حالته، وطبيعي بعد أي ثورة الفن ينهار شوية.
أتمنى من المسؤولين عن المهرجانات الاهتمام بالقمم
وأضاف عمر عبد العزيز: أتمنى من المسؤولين عن المهرجانات الاهتمام بالقمم، ودايمًا أقول، أين علي بدرخان ومحمد عبد العزيز وخيري بشارة ومحمد ياسين وعلي إدريس وشريف عرفة وهاني لاشين ومحمد أبو سيف، فهناك جيل كامل غايب وبعيد خالص، وإحنا عارفين ليه لأنه لا يحب غير أنه يشتغل غير بالطريقة اللي نشأ عليها، ولا أتصور مخرج يدخل فيلم نصه ما اتكتبش أو يبدأ مسلسل بحلقتين ويتكتب وهو بيتصور، وإحنا مش بنمشي بترتيب الفن اللي اتربينا عليه، وزمان المنتج كان يجيب المخرج ونشتغل على الورق مع السيناريست ثم نختار الكاست، لكن حاليًا بيتقال المسلسل بطولة كذا، ودي مش مهنة والعملية منهارة.
مفيش عدالة توزيع
وواصل: أرجو وجود الأساتذة الكبار مع الشباب وفيه شباب يفرح، لكن مفيش عدالة توزيع وفيه مخرج ييقدم تلات أو أربع أعمال ومخرجين بعيدين عن الساحة، فيه منهم كبروا وما يقدروش يقفوا فممكن استعين بيهم في قراءات سيناريوهات والتوجيه، وأنا لا أتصور أن بشير الديك بقالي 20 سنة ما شفتش ليه عمل، في الوقت اللي بشوف أولاد بيتعمل لهم أعمال بيغلطوا في الإملاء، وأتمنى نركز على السينما المصرية اللي بتعبر عن حالة الشارع المصري وأحوال المصريين ويحصل تنوع.
عمر عبد العزيز عن غيابه: محدش بيبعت لنا شغل
وعن سبب غيابه بالأخص قال: محدش بيبعت لنا شعل ومش عاوزين مخرجين بجد، ولا أتصور يجيلي سيناريو من بطولة كذا، لأن أول شيء أنا اللي اختار البطل، وللأسف بيختاروا البطل قبل المخرج لكن أنا مش هشتغل بالطريقة دي، ومسلسل فيه تلات حلقات يكمل وأنا شغال، ويدخل عليا رمضان يقولي صور 20 ساعة دا شيء غير آدمي.
واستكمل: بشوف معظم الأعمال واحد داخل يضرب الحارة كلها ويموت الناس، لكن إحنا عاوزين أعمال تناقش واقعنا وأرجو نستغل هذا التعاون السعودي لصالح الفيلم المصري.
