رامي جمال: مكنتش مستني فلوس من ورا المطرب النقاش.. وعندي أغنية لتوديع رمضان
علق الفنان رامي جمال، على مباركته للفنان تامر حسني على أغنيته الجديدة التي طرحها في نفس توقيت طرح جمال أغنية بقيس بيكي الجمال، بجانب حديثه عن تعاونه مع زوجته في أغنية دوخناك يا فراق، وعلاقته بالمطرب النقاش أحمد سالم.
رامي جمال يبارك لـ تامر حسني على أغنيته الجديدة
وقال رامي جمال، في تصريحات تلفزيونية، عن مباركته للفنان تامر حسني على أغنية 30 حياة: مين له في رزقي إيه؟ إني أبارك لتامر حسني أو أي فنان زميل؟ أنا ببارك على عمل عجبني، وبقوله متزعلش يا تامر.
وعن تعاونه مع زوجته ناريمان في أغنية دوخناك يا فراق، قال جمال: ناريمان مراتي مبتزنش في أي حاجة خالص، أنا اللي اخترت ليها الأغنية وقررت أغنيها معاها.
رامي جمال يستعد لطرح أغنية لتوديع رمضان
كما كشف رامي جمال، عن تحضيره لأغنية دينية في شهر رمضان، قائلًا: عندي أغنية لتوديع رمضان هتنزل في آخر 15 يوم إن شاء الله.
رامي جمال عن المطرب النقاش أحمد سالم: مكنش مرتاح ليا
وتحدث الفنان رامي جمال، عن المطرب النقاش أحمد سالم، والذي يعتبر أول من ألقى الضوء على موهبته، قائلًا: أحمد في الوقت اللي قررت فيه أنتج له كان هو مضى مع حد تاني، وأنا صعب أبدأ معاه وهو مضى مع حد تاني، ربنا يبارك له وأنا مكنتش مستني من وراه فلوس أنا كنت هصرف فلوس، وهو مكنش مرتاح ليا في الوقت اللي أنا كنت متحمس له، وقرر وهو معايا يتعاقد مع حد تاني، ودي حاجة لا تعيبه وربنا يكرمه.
أما عن ألبومه الجديد، علق رامي جمال: عندي ألبوم في العيد وكنت محتاجه يكون في الشتاء وأعكنن عليكم، ولسة بادئ الإنتاج فبجرب، والشعب العربي شعب حساس والأغاني الدراما عبارة عن حكايات حصلت ودايمًا ليها وجود في قلب الجمهور وبندوس على الجرح، والحمد لله شوفت رد الفعل حلو أوي وأنا لسة طماع في حاجات كتير.
