إيناس مكي: كل مخرجين مصر اترجوني أعمل تجميل في مناخيري وأنا رفضت
تحدثت الفنانة إيناس مكي عن رأيها في عمليات التجميل التي تلجأ إليها الفنانات والمشاهير باستمرار خاصة في السنوات الأخيرة، وإمكانية خضوعها لعملية تجميل.
وقالت إيناس مكي في تصريحات لـ القاهرة 24: ما عملتش تجميل وده واضح جدًا، وفرحانة إن الناس بتشوف وشي هو هو ما اتغيرش من وقت بدايتي في التمثيل.
وأضافت إيناس مكي: من 25 سنة ومخرجين مصر كلهم اترجوني أعمل مناخيري، علشان العضمة الجمب الموجودة عندي، هي مناسبة لوشي ولحجمه، ولكن بالنسبة لهم في التصوير مش مناسبة، وأنا ما بشتغلش مانيكان ورفضت، والمخرج هاني لاشين كان مُصر يقنعني.
وتابعت إيناس مكي: أنا مش بحب عمليات التجميل، ولكن أؤيد الخضوع للتجميل لما الست تكون هتصلح حاجة باظت أو بعد تعرضها لأي مشكلة والحل انها تصلحها، وكمان عشر سنين لو حصل لي حاجة وتحتاج تدخل مش هكون ضد ده، ولكن بشرط ما أغيرش شكلي اللي خلقه ربنا ودي قتاعتي وهتفضل قناعتي حتى لما اعجز.
على جانب آخر، تحدثت إيناس مكي عن سبب تغيبها منذ سنوات، مشيرة إلى أن التقصير ليس منها ولكن من شركات الإنتاج والمخرجين والمنتجن وأحيانًا يعرض عليها أعمال لا تقتنع بها.
وأضافت إيناس مكي: معنديش بيزنس أو دخل مادي والحمد لله من عيلة كويسة من ناحية الأب والأم، ومستورة، وحاليًا اهتمامي بوالدتي خاصة من بعد خضوعها لعملية قلب مفتوح وتغيير شريان سنة 2017 من وقتها ما كانش ينفع تقعد في شقتها لوحدها وبقيت قاعدة عندي، واهتمامي ببيتي وأمي اللي أصبحت بنتي، وكذلك اهتمامي بكلابي.
