بيومي فؤاد: أول أجر خدته كان 750 جنيه.. وبدعي ربنا مقعدش في البيت
تحدث الفنان بيومي فؤاد عن كثرة مشاركته في الأعمال الفنية، مشيرًا إلى أنه لا يخجل من عمل كاستينج للعمل الفني قبل التعاقد عليه.
وقال بيومي فؤاد، في حواره مع الإعلامية إسعاد يونس، ببرنامجها صاحبة السعادة والمذاع عبر شاشة قناة DMC، إنه يحب العمل كثيرًا، ودائمًا يطلب من الله عدم الجلوس في المنزل بدون عمل، متابعًا: أنا طالع لأبويا وبحب الشغل، وبدعي ربنا على طول أنه يكفينا قعدت البيت من غير شغل، وفيه ناس لما بتطلع معاش حالهم بيتغير لما بيقعدوا في البيت، ومن وأنا موظف حكومي كنت بعمل 3 مسرحيات في نفس الوقت، وكنت راضي وبحمد ربنا، فموضوع الكم ده من زمان
بيومي فؤاد: مبتكسفش من أني أعمل كاستينج في السن ده
وكشف بيومي فؤاد، رأيه في خضوع الفنانين لكاستينج قبل التعاقد على الأعمال الفنية، قائلًا: قبل الشهرة بشوية عملت كاستينج مع يسري نصر الله ومخدنيش، ولما قابلته بعد كدا اتكسفت أني أسأله، بس هو اللي قالي مش أنا كنت عملتلك كاست ومخدتش، عارف ليه؟ عشان أنت مكنتش لايق على الدور ده، مبتكسفش من أني أعمل كاستينج في السن ده، أحمد بدير ونور الشريف عملوا كاستينج مع يوسف شاهين في المصير.
بيومي فؤاد عن أول أجر تقاضاه: 750 جنيه ومصدقتش نفسي
على جانب آخر، تحدث الفنان بيومي فؤاد عن أول اجر له من الفن، موضحًا أنه 750 جنيهًا، وعقب: عملنا بروفات لمسرحية مدة سنتين، وعرضناها في مركز الهناجر للفنون الكلام ده في سنة 1997، وأجري فيها كان 750 جنيه، والرقم ده أنا مصدقتش نفسي، معقول همثل والناس هتتبسط وكمان هاخد فلوس، هي دي النعم، أنا كنا بنصرف على المسرحيات قبلها.
