أصدقاء نيرة صلاح طالبة العريش يكشفون تفاصيل جديدة حول وفاتها: كلمت مامتها قالتلها الحقيني بطني بتتقطع | خاص
اهتزت مواقع التواصل الاجتماعي خلال الأيام الماضية، بفاجعة انتحار شابة تدعى نيرة صلاح، بعد تناولها حبة سامة، حتى لفظت أنفاسها الأخيرة مساء السبت الماضي، جراء حملة ابتزاز عليها من قبل زميلتها في الجامعة تدعى شروق، وفقًا لما تدواله أصدقاؤها، إلا أن بعد انتشار تفاصيل ابتزاز الأخيرة لها شك العديد من أسرتها وأصدقاؤها في سبب وفاتها.
تفاصيل جديدة في وفاة نيرة صلاح
وكشف صديق مقرب لنيرة وأحد أقاربها أيضًا لـ القاهرة 24، تفاصيل اللحظات الأخيرة في حياتها، قائلًا: كلمت مامتها وقالتها بطني بتتقطع.
وقال: نيرة محكتش لحد اللي اتعرضلته، وأنا وهي متكلمين يوم الخميس، وكلمت جدها الجمعة وهي توفيت السبت بليل.
ماما الحقيني بطني بتتقطع
وأَضاف: نيرة قريبة من مامتها جدا، وبتحكي كل حاجة، وهي مكنتش بتخاف مننا أصلا، يعني حتى موضوع الصورة دا لو كان نزل مكنش هيفرق معانا؛ لإن الكل عارف نيرة كويس، والعيلة برضه عارفاها ومهياش عيلة راجعية يشكو فيها والكلام الفاضي دا، بالعكس كان على الأقل هيبقى فيه إجراء.
وتابع: نيرة كانت عاوزة تحل المشكلة لوحدها من غير تدخل حد، على إن الموضوع خناقة وهتخلص.
وواصل: نيرة مش عيلة صغيرة دي كانت عاقلة وطيبة وحافظة للقرآن وبتصلي ومحترمة، دي شهادة الجميع.
تفاصيل جديدة في واقعة وفاة نيرة صلاح
واستطرد: يعني هي دلوقتي نيرة اعتذرت على جروب الدفعة زي ما اطلب منها، فإيه اللي يخليها تروح تنتحر، وامتى؟ مش في نفس اليوم، لا دا بعدها بيوم، وهي صايمة، وكمان بعد المغرب علطول!
وأردف: تحدثت مع والدتها قبل وفاتها بلحظات، قائلة: ماما الحقيني بطني بتتقطع، ثم بعد تلك المكالمة تتواصل المدينة الجامعية مع الأم تبلغهم أن ابنتها في العناية المركزة نتيجة تسمم.
وأشار إلى أن العائلة في الدقهلية مركز دكرنس قرية ميت طريف، وبمجرد وصول نيرة كانت لفظت أنفاسها الأخيرة.
فيما قالت ر. ر صديقة نيرة: أنا بكلمها كل يوم ومحكتليش أي حاجة، بالعكس كانت عادية جدًا.
وأضافت لـ القاهرة 24: نيرة كانت متدينة وعارفة ربنا كويس وبتصلي وتصوم وقريبة جدًا من أهلها، أنا عارفة عنها تقريبا كل حاجة، لأنها مكنتش صاحبتي، كانت أكتر من أختي.
وتابعت: كنا بنتكلم عادي وفي عيد ميلادها يوم 25 فبراير، وكانت كويسة جدًا ومجبتليش سيرة، عشان كده محدش مصدق إنها انتحرت من كتر قربها لربنا.
وتعود الواقعة لوفاة نيرة صلاح 19 عامًا، إثر تناول مادة سامة، وفي الوقت الذي كشف فيه التقرير الأولى للمستشفى سبب الوفاة، حيث استقبلت الراحلة وهي مصابة باضطراب في درجة الوعي وهبوط حاد في الدورة الدموية، ونبضها ضعيف ناتج عن تناولها مادة سامة غير معلومة، وجرى لها تقديم الإسعافات الأولية، إلا أنها فارقت الحياة.
وتدوال رواد مواقع التواصل الاجتماعي محادثات بين نيرة وصديقتها بكلية الطب البيطري بجامعة العريش، تتضمن ابتزاز الأخيرة للراحلة من حيث نشر صور خاصة لها على مواقع التواصل الاجتماعي.
