حورية فرغلي: هيثم أحمد زكي ضربني وشتمني بسبب الغيرة.. ومات وهو بيحبني
حلت الفنانة حورية فرغلي، ضيفة على الإعلامية إنجي علي، في برنامجها أسرار النجوم المذاع عبر محطة نجوم FM، وتحدثت خلال اللقاء عن مشوارها الفني، وتفاصيل علاقتها بالفنان الراحل هيثم أحمد زكي.
ونستعرض لكم أبرز تصريحات حورية فرغلي:
- أنا قابلت هيثم أحمد زكي عند الأستاذ خالد يوسف لما كنا بنعمل فيلم كف القمر، وأنا أكبر منه بـ 6 سنين وكنا أصحاب ودخلت بيته، الهدوء اللي فيه متقوليش إن في حد ساكن في البيت ده.
- هيثم أحمد زكي كان وحيدا بشكل كبير وكان بيطلب الأكل ويسيبه 4 أيام ومكنش حد بيجي يوضب له بيته، وبقيت أنا بعمل كده، وأنا حبيته جدًا وميلت ليه في وقت من الأوقات، ولكن هو كان غيورا جدًا.
- علاقتي بـ هيثم أحمد زكي انتهت وإحنا بنصور دوران شبرا، والدة الفنان هاني عادل توفيت وكنت بعزيه، راح هيثم جابني من شعري وضربني وشتمني وقالي يا طنط، قولتله أنت علمتني ماعرفش حد أصغر مني بيوم.
- ناس كتير بتقول إن هيثم أحمد زكي، توفى وهو لسه بيحبني، وهو حاول كتير إننا نرجع والموضوع كان بيوصل بيه لحتة خطر.
- تعرضت لتنمر كبير بسبب العمليات التي أجريتها في أنفي ووجهي، وده دخلني في حالة اكتئاب فظيعة، الحقيقة التنمر أذاني أكثر من الحادث الذي تعرضت له.
- أنا الحمدلله حاليا بعد آخر عملية أجريتها بقيت أشم بشكل كويس وحياتي بقت أفضل، واللي عايز يشغلني يشغلني، أنا موجودة وداخلي طاقة أكبر من الأول.
- علشان معنديش شغل كتير زي الأول، قررت أعمل مسرحية للأطفال وهعمل شخصية ريبونزل.
- وحشني الشغل أنا بعشق التمثيل لأني أعيش داخله كذا حياة، وكل حاجة كان نفسي أعملها تظهر في الشخصيات اللي بقدمها، مشكلتي إنه معنديش معارف في الوسط الفني.
- أتذكر دائمًا بالخير الفنانة غادة عبدالرازق، اشتغلنا سوا في عمل سابق، وهي دائمًا كانت تقول إنني خليفتها في عالم التمثيل.
- مضيت عقد مسلسل ساحرة الجنوب الجزء الثالث، والعمل بالفعل جاهز للتصوير لكن كل شيء توقف، وحاولت أكلم الشركة المنتجة يتنازلوا عنه وأقدمه أنا لكنهم رفضوا، والمسلسل ده هو الأقرب إلى قلبي، وحقق أعلى نسبة مشاهدة في تاريخ الدراما.
- عندي فيلم جديد مع المخرج خالد الحجر من بطولة الفنانة إلهام شاهين، وهو في مرحلة التحضير حاليا وسعيدة جدا لأنها المرة الثانية التي سأمثل أمام إلهام شاهين، وهي أول واحدة وقفت بجواري في الوسط الفني، ومبسوطة بفكرة الفيلم.
