خسرت فلوسي في لعبة رهان وكان عليا ديون لازم أسدها.. ننشر اعترافات مدرس الفيزياء المتهم بقتل إيهاب أشرف
كشف التحقيقات في اتهام مدرس الفيزياء بقتل الطالب إيهاب أشرف، كواليس وتفاصيل الجريمة بعد أن قطع جسده إلى 3 أجزاء بقرية 7 ثابت التابعة لمركز الستاموني في محافظة الدقهلية.
اعترافات مدرس الفيزياء المتهم بقتل إيهاب أشرف
واعترف محمد.ع مدرس الفيزياء المتهم بقتل إيهاب أشرف في القضية رقم 1041 لسنة 2024 جنح الستاموني: اللي حصل أن أنا طالب في آخر سنة في كلية تربية قسم الفيزياء جامعة المنصورة وبشتغل مدرس خصوصي بعطي دروس فيزياء وكيمياء لثانوي عام وعلوم الابتدائي وإعدادي عشان أحصل منها على دخل كويس، علشان أنا متجوز ومخلف ولد عنده سبع شهور، وعشان أنا أبويا متوفي وعائلتي متوسطة الدخل، وأنا في بداية حياتي وعاوز أعلي من دخلي اشتغلت في كذا سنتر في الدروس الخصوصية في منطقة المركزية ومنطقة النقعة ومنطقة 37 البنزينة، وكلهم تبع منطقة الحفير مركز الستاموني ومتوسط الدخل الشهري بتاعي كان في بداية الترم الأول 8000 جنيه، وبعد كدة زاد المبلغ مع تزايد عدد الطلاب.
ننشر اعترافات مدرس الفيزياء المتهم بقتل إيهاب أشرف
وأضاف المتهم بإنهاء حياة إيهاب أشرف: العدد كان بيزيد لأن الطلبة كانوا بيجيبوا درجات كويسة ووصل دخلي في بداية الترم الثاني إلى 20 ألف جنيه تقريبًا وفي بداية سنة 2023 السنة اللي فاتت عرفت من ناس أن فيه لعبة اسمها one XBET بتاعة المراهنات نزلتها من على جوجل كروم واللعبة دي عبارة عن مراهنات على ماتش كورة أو أي رياضة من الرياضات اللي بتتذاع أو عدد الأهداف اللي بتتسجل، وفيها ألعاب ثانية زي الكوتشينة والدومينو على نفس التطبيق ده وبربط الحساب بتاعي على التطبيق بالحساب بتاعي على فودافون كاش وببدأ أراهن بجزء من المبالغ اللي على حسابي ولما بكسب بينزلي المكسب على حسابي في فودافون كاش وفي البداية كنت بكسب وبعد كدة بدأ المكسب ده يتحول لخسارة.
اعترافات مدرس الفيزياء
وأكمل المتهم بقتل إيهاب أشرف: بدأت أراهن بمبالغ أكبر علشان أعوض الخسارة، وبدأت أجيب من المبالغ اللي محوشها في البيت واتحجج لمراتي إني رايح اشغل فلوسي مع واحد صاحبي في الموبايلات، ومرة تانية أقولها واحد عاوز يستلفه مني وفضلت برضو أخسر اللعبة لحد ما خسرت فلوس كتير ومكنش معايا بعدها فلوس أراهن بيها لحد ما عرفت أن عمي كان بايع أرض ورحتله البيت علشان أعرض عليه إني اشغله فلوسه في تجارة الموبايلات مع واحد صاحبي وأقنعه أنها بتحقق أرباح أعلى من النسبة اللي البنك ممكن يوفرها.
المتهم بقتل إيهاب أشرف
وواصل: كنت بقولهم أن النسبة بتوصل في بعض الأوقات لـ 55% وبدأت أسحب منهم مبالغ على فترات متقطعة وأخدت من عمي تقريبا 140 ألف جنيه على فترات ومن ابن خالي حسان حوالي 15 ألف جنيه وأخدت من مرات عمي رايق اسمها فاطمة 26 ألف جنيه تقريبًا وأخدت من ابنها باسم 22 ألف جنيه واخدت من مرات عمي وأسمها نادية 64 ألف جنيه، واللي كنت مفكر أن أنا لما أراهن هقدر أجيب نسبة الأرباح دي لأني كنت في بداية اللعبة، وكان الاتفاق إن بداية تسليمهم الأرباح على شهر 8 سنة 2024 وأن نسبة أرباح كبيرة بس تاني يوم كنت بخسرهم، لما لقيت نفسي مش هقدر أجيب أرباح المبالغ اللي أخدتها من قرايبي بالإضافة إلى ابن خالي كان ميعاد استلامه الفلوس في شهر يناير 2024 وكان المفروض هيستلم 27 ألف جنيه.
وتابع المتهم: وأمي وأخواتي كانوا بيرفضوا يدوني فلوس علشان عارفين إني ممكن أخد الفلوس واضيعها بس أنا كنت عاوزها علشان أسدد ديوني مش علشان أراهن بيهم فقعدت فكرت فملقتش حل غير إني أخطف حد واقتله واطلب فدية فلوس كتير تغطي ديوني والفكرة دي ركزت في دماغي من حوالي أسبوعين قبل الواقعة، ولما فكرت أني أخطف حد وأطلب فدية بس من غير ما أقتله كنت هحتاج معايا حد تاني يكون غريب عن المنطقة - يساعدني، وأنا مكنش التمن في حاجة زي كدة وفي نفس الوقت مكنش حد قدامي بعينه ممكن أسرقه ففكرت أني أخطف حد من اللي بياخدوا عندي درس واقتله عشان أخفيه وأطلب من أهله فدية فجه في دماغي واحد بياخد درس عندي اسمه إيهاب أشرف وده كان بياخد عندي حصص - فيزياء في قرية النقعة السبت والثلاثاء الساعة 5 مساءً ويوم الأحد والأربعاء بياخد معايا درس كيمياء في قرية المركزية الساعة 2 مساءً ويوم الاثنين والخميس وأنا راجع من قرية المركزية بيركب - معايا على الموتوسيكل علشان بيته قبلي في نفس الطريق وأنا مروح فيعتبر بشوفه طول الأسبوع، وأنا عارف أن أهله معاهم فلوس وأعرف أن أبوه عنده محل أدوات منزلية ومصنع سيليكون في دمياط، وهو ولد وحيد على بنات فأكيد لما أطلب فدية هيدفعوا، فقررت في الأول إني أنفذ وأقتله يوم السبت 2024/2/10 وفعلا اشتريت السكينة يوم الثلاثاء اللي قبله من معرض أدوات منزلية في قرية النقعة بس لما إيهاب جالي يوم السبت وخلصنا الحصة واللي معاه مشيو وبنقعد نلعب بلايستيشن شوية على اللاب بتاعي وبعدين طلعت السكينة وقعدت أهزر لأن بيني وبينه هزار بس خفت ورجعت وهو مشي.
وأردف المتهم: قبل يوم الثلاثاء اللي أنا نفذت فيه الجريمة لقيت ابن خالي بيطالبني بالمبلغ اللي أنا كنت واخده منه فقولت بيني وبين نفسي ملهاش حل غير إن أنا أقتل إيهاب وبعدها يوم الثلاثاء إيهاب كان عنده درس عندي الساعة 5 مساءً وكان في المجموعة دي بنتين معاه واحدة اسمها ندى محمد وواحدة اسمها نهى محمد، والمجموعة دي مجموعة خاصة لمادة الفيزياء وبعد ما خلصوا البنتين مشيوا الساعة 6.20 مساءً وإيهاب فضل معايا عشان أشرحله درس كيمياء أخد مننا حوالي 20 دقيقة وقعدنا نلعب بلايستيشن في الوقت ده أمه كلمته مرة بين الدرسين والمرة الثانية بعد ما خلصنا درس الكيمياء وهو قالها أنا خلصت الدرس وجاي.
