نجل حلمي بكر: أبويا وصاني على أختي.. وهجيب حقه من أرملته | خاص
كشف هشام نجل الموسيقار الراحل حلمي بكر، تفاصيل وصية والده له قبل رحيله، بجانب الحديث عن أزمة خروج جثمان والده من المستشفى عقب وفاته، مؤكدًا أنه سيحرر محضرًا ضد أرملة والده بالإهمال الطبي.
وقال هشام حلمي بكر، في لقائه مع القاهرة 24، عن تفاصيل الفترة الأخيرة في حياة والده: زوجته اللي هي دلوقتي أرملته هي كانت مسيطرة على والدي وبعتته الشرقية بدل ما يروح العناية المركزة، لأن الدكتور بتاعه قال إنه أمر بنقله للعناية المركزة، فهي خرجته من بيته في المهندسين وودته كفر صقر.
أما عن اتهامه لـ أرملة والده بقتله، فعلق نجل حلمي بكر: كلمة تسمم مطلعتش مني، دكتور العناية المركزة في كفر صقر، هو اللي قال إن عنده تسمم ومشاكل في الكلى وهبوط حاد في الضغط وأنيميا حادة وجفاف حاد، ومعنى كلامه يدل على الإهمال ومكنش فيه رعاية طبية لازمة، وزوجته طلعت في القنوات تقول إنها عاملة مستشفى في البيت اللي في الشرقية، وإن بيجي له كل الرعاية المطلوبة.
كما علق نجل حلمي بكر، على انتقادات عدم مجيئه لرؤية والده قبل وفاته، قائلًا: أنا مجتش علشان والدي توفي أنا جالي خبر وفاته وأنا جاي امبارح في المطار، أنا هاجرت برا مصر وأنا عندي 15 سنة، أنا عندي 49 سنة دلوقتي وعشت كل حياتي برا مصر وعلاقتي بـ أبويا عادية جدًا، وكنت باجي مصر كل سنتين أو تلاته.
أما عن تفاصيل وصية والده له، فقال نجل حلمي بكر: أنا أبويا وصاني على أختي وعندي تسجيلاتي بتواصلي معاها مع أني عمري ما شوفتها في حياتي، ولكن أبويا وصاني وقالي قوي علاقتك مع أختك علشان المسافات اللي بينا.
نجل حلمي بكر: سأحرر محضر ضد أرملة والدي بالإهمال
وكشف نجل حلمي بكر، أنه سيحرر محضرًا ضد أرملة والده، قائلًا: أنا هجيب حق أبويا، والنهاردة هنقعد مع أستاذ مرتضى منصور وهيكون فيه محضر، وعلى الأقل هيكون فيه محضر بالإهمال.
واختتم: أنا مش مخبي أي حاجة، وعايز أنسق مع العائلة ولسة مجاليش فرصة أقعد معاهم وأنسق ميعاد الجنازة والعزاء، وأنا دلوقتي هدخل أودع أبويا في المستشفى.
