بوسي: البنات الصغيرة بيصعبوا عليا بسبب عمليات التجميل.. ومبقتش عارفة إيه الطبيعي وإيه مش طبيعي
أعربت المطربة بوسي عن رفضها لعمليات التجميل، واستيائها من إجراء الفتيات الصغيرات في السن لعمليات التجميل وحقن البوتكس والفيلر.
وقالت بوسي في تصريحات تلفزيونية: الجمال الطبيعي بقى قليل، ودلوقتي مبقتش عارفه الطبيعي من اللي مش طبيعي، بالذات أنهم لسا صغيرين جدًا على أنهم يلعبوا في وشهم، أو يعملوا فيلر أو بوتكس.
وأضافت بوسي: الفيلر والبوتكس بتاع الناس اللي بتعدي السن شوية، وبتحاول يصغروا نفسهم، لكن بلاقي بنات صغيرين أقل من 20 سنة ومغيرين في وشهم وبيصعبوا عليا بجد، وفعلًا عمليات التجميل دلوقتي بقت إدمان.
انفصل بوسي عن زوجها هشام ربيع
وعلى جانب آخر، انفصلت المطربة بوسي عن زوجها رجل الأعمال هشام ربيع، حيث قال هشام ربيع في تصريحاته لـ القاهرة 24: حصل بالفعل الانفصال بيني وبين بوسي، وده بعد ما خلصتلها الموضوع بتاعها زي أي راجل مصري، وأي راجل مراته هتتعرض لابتزاز أكيد مش هيسكت، وأنا جبتلها حقها تالت ومتلت، وأي راجل مصري وحر مش هيسمح إن حد يبتز مراته.
وأضاف هشام ربيع: إحنا من ساعة ما اتجوزنا والدنيا مش لطيفة ومش حلوة، والمشكلة اللي حصلتلي كانت بسببها واللي اتأذوا فيها كانوا ولادي ووالدتهم، ومحدش وقف جنبي غير أم ولادي، وده اللي زعلني من بوسي، هي موقفتش جنبي خالص.
