ليلى الشبح: حلمي بكر قالي مراتي خدت بيتي وطردتني
كشفت المنتجة ليلى الشبح، سبب شجارها مع سماح القرشي أرملة الموسيقار الراحل حلمي بكر، في عزائه بمسجد الحامدية الشاذلية، مؤكدة أن الموسيقار لجأ لها لحمايته من القرشي.
وقالت ليلى الشبح، في لقائها مع القاهرة 24: أنا كنت قاعدة مع المستشار مرتضى منصور في العزاء، وبنتي كلمتني علشان نمشي وقالتلي بيتكلموا وبيغلطوا فيكي، فأنا روحت أسألهم بتغلطوا ليه؟ قالولي خلاص علشان العزاء ولقيت قصادي هند عاكف، وبنت أخت هند عاكف تبقى مرات نور اللي نصب على حلمي بكر في 2 مليون جنيه، قولت لها يعني قاتلين الميت وماشيين في جنازته أنتي ولا مراته؟ كنتي هاتي من نور الـ 2 مليون اللي حلمي اتقهر بيهم.
وتابعت ليلى الشبح: لقيت مرات حلمي بكر، بتقول مين ليلى حواوشي دي؟ هي مين دي أصلًا؟ لأ أنتي عارفة أنا مين كويس أوي، وعارفة أنا عارفة عنك إيه من حلمي، كل حاجة بتعمليها حلمي حكاها ليا بتفاصيلها وناسها، أنتي وغيرك الناس اللي معاكي عندي.
ليلى الشبح: مرات حلمي بكر عملت له عمل علشان يرجع لها
وأضافت: حلمي بكر لجأ ليا من كام سنة وقالي الست دي بتعذبني وخدت بيتي وطردتني، رجع قالي أنا صابر وقاعد علشان بنتي، وبعد كده رجع لها الشهور اللي فاتت، وطبعًا هي حبت أنه يكتب الشقة باسمها ومعرفش بصراحة عملت له أعمال ولا لأ علشان يكتب عليها تاني.
