شريف إدريس بعد تعرضه لوعكة صحية: دموعي نزلت من كتر الألم
طمأن الفنان شريف إدريس جمهوره على حالته الصحية، بعد تعرضه خلال الساعات الماضية لوعكة صحية شديدة نقل على إثرها إلى المستشفى.
وكتب شريف إدريس، منشورًا عبر حسابه الشخصي بموقع التواصل الاجتماعي فيسبوك، وقال: صباح الخير.. شكرا من قلبي لكل الحبايب اللي بيحاولوا يتطمنوا عليا من إمبارح وبعتذر عن عدم ردي.
وتابع شريف إدريس: باختصار شديد بقالي فترة ضهري تاعبني ومأثر على رجلي لأن عندي انزلاق غضروفي في الفقرات القطنية وأهملته، وكنت بستحمل وماشي بمسكنات، إمبارح كنت بجيب حاجات للبيت مع مراتي وبدأت أتعب بشكل غير طبيعي وفجأة حصلي تخشب تام في الجزء السفلي مع كل أنواع الألم اللي ممكن تتخيلوه.
وأضاف إدريس: حاولت أتحمل واخد مسكن لكن الوضع تحول إني في لحظة حسيت إن ضهري هيتكسر حرفيًا وألم في جميع أطراف رجليًا الاتنين ودموعي نزلت من كتر الألم حقيقي.. روحت مستشفى عملوا آشعة مبدئيأ، والدكتور قالي أنا كنت هدخلك تعمل رنين بس من اللي شايفه من الآشعة مش هينفع ومش هتقدر تستحمل حتى جهاز الرنين ووراني شكل عضلات ضهري وهي تشنج حرفيا.
واختتم شريف إدريس حديثه: علقولي محاليل مسكنات وكتبلي أدوية أمشي عليها لمدة خمس أيام راحة تامة وبعد كده أعمل رنين وأبدأ رحلة علاج، بس بأمانة أنا شفت وحسيت بألم لا يمكن وصفه نتيجة التهاب حاد في الأعصاب.. الحمد لله على كل شيء بشكركم جميعا.
