إحدى ضحايا مستريح المطاعم: مسمي مشروعه الحلم.. ووعدنا بأرباح 100% وخد فلوسنا وهرب
قالت الدكتورة نرمين مصطفى إحدى ضحايا مستريح المطاعم فود بلوجر شهير على السوشيال ميديا، يدعى محمد.ع، إن القصة بدأت بإعلان منتشر عبر مواقع التواصل الاجتماعي كفرصة للاستثمار، مشيرة إلى أنها كانت غير متحمسة في بداية الأمر لكنها عندما شاهدت الإعلانات وظهور المتهم عبر قنوات تلفزيونية يعلم عن مشروعه، وبعد الاطلاع على الأوراق الخاصة بالمطاعم بدأت تفكر في الأمر.
ضحايا مستريح المطاعم
وأضاف نرمين إحدى ضحايا مستريح المطاعم في تصريحات خاصة لـ القاهرة 24، أنها وثقت في المستثمر بعد ظهوره في أحد البرامج يتحدث عن مشروعه وذلك في شهر أكتوبر 2022، حيث تواصلت معه وتوجهت إلى المكتب بمدينة نصر، حيث زعم شراكته مع أحد الوزارات الهامة، لافتة إلى أنه لديه بعض البرندات زعم أنه شريك فيها وما أكد هذا هو الأوراق.
وأكملت الدكتورة نرمين مصطفى إحدى ضحايا مستريح المطاعم: كلمتهم وأخدت ميعاد وروحت علشان الاتفاق، قالولي فيه مطعم مشهور والمطعم ده شغال وموجود في الزمالك، والتاني كان مطبخ زعم أنه شريك مع وزارة وأنه كان بيوري الناس المطبخ للي بيوزع ومكان بيبيع الوجبات الجاهزة، وكمان طلع منه فكرة مطعم تاني وبيسعى أنه يبقى ليه أكتر من فرع، وكان بيطلع في التليفزيون يكدب ويتكلم في المشاريع دي، ويقول إنه كان مغترب وبعدين قرر يرجع بلده عشان يعمل بيزنس كبير هنا، وكان بيقول أن الشراكة الأفضل أنه يبقى أكتر من شريك، لأن كل واحد مش هيقدر يقوم مشروع لوحده كان بيضحك على الناس وبيقنعهم بالجملتين دول.
وأشارت إحدى ضحايا مستريح المطاعم، إلى أنه زعم عدة عروض من ضمنها مساهمات بشراء حصة في فرع بأي مبلغ متاح، وأكد أن الأرباح تتخطي الـ 60 % في السنة الأولى وفي السنة الثانية تصل إلى 100 %، مردفة: قالنا الأرباح أول سنة 60 في المية والسنة الثانية 100 في المية وكان مسمي المشروع الحلم وأوهمنا أن أفضل بيزنس اللي بيبقي فيه شراكة بين ناس كتير.
وواصلت ضحية مستثمر المطاعم: أنا فعلا روحت 26 يوليو ولقيت ليه عدة مطاعم، وكان بينزل الناس ويقولهم أنا شريك مع إحدى الوزارات عشان يقنع الناس ويوهمهم بمدى مصداقية مشروعه، وبالفعل لما روحت لقيت الكلام بجد ولقيت الشركة معروفة ولقيت مشارك ناس قبلي، وكنت بدخل على صفحته على الفيس بوك قبل والناس بتدخل تعلق وتقول إنها بقالها معاه كتير وأنهم منتظرين فرصة تانية عشان يزودوا استثماراتهم، وطلعوا ناس مأجرهم يقولوا كده.
وتابعت: دفعت مبلغ في الأول 100 ألف وأنا كنت محددة هجرب بـ 100 ألف لما أشوف النتيجة مرضية ليا ولا لا، اللي أنا كنت داخلة فيها وهي كانت عبارة عن أرباح سنوية، وأنا كنت عايز ازود دخلي، وكان عامل عرض أن اللي هيستثمر بـ 50 ألف أو مضاعفاتها هياخد 10% أسهم هدية، علشان أنا كده كنت داخله بـ 100 ألف يساوي 100 سهم فاداني في العقد مكمل للعقد الأساسي أن ليا 10 أسهم زيادة بمعني إني كان ليا 110 سهم، ونصب عليا وعملنا محضر وأحنا ضحايا كتير.
