طليقة نجل شقيقة حلمي بكر تستغيث: عايزة الشقة تكون باسم أبو بناتي
كشفت نهى مجدي طليقة نجل شقيقة الموسيقار الراحل حلمي بكر، تفاصيل خلافها مع حماتها شقيقة الموسيقار الراحل، مؤكدة أنها تعرضت للظلم منها، كما أنها تطالب أن يٌكتب مسكن الزوجية باسم طليقها مما يضمن حق بناتها وعدم طردهم من الشقة.
وقالت نهى مجدي، في لقائها مع القاهرة 24: مفيش حد بيبعت أي حاجة للبنات غير أنهم بيدوني نفقة كل شهر 3 آلاف جنيه وحاجات بسيطة أوي لو يقدر والدهم يوفرها للدروس، والشهور اللي فاتت لما جاله سفرية جاب للبنات هدية، ولما جاله سفرية ممكن يزود 2000 جنيه كده للبنات ولكن ميقولش لوالدته، جت بنتي وقالتلي أنتي بتحاربي ليه وبتتخانقي مع بابا لما بتعرفي أن هما متجمعين وإحنا مش معاهم، إحنا كبرنا خلاص ومش هنشحت ودهم، بنتي الكبيرة قالتلي ربنا ربانا معاكي ومش عيزنا هناك علشان منافقش.
وتابعت: أبو بناتي تعبان بقاله فترة وعنده مشاكل في القلب، هما عجزوني أني مبقدرش أعمل معاه مشكلة علشان التعب اللي هو فيه، وربنا عالم أني كنت بروح أنضف شقة أبو بناتي ومش عارفة هي إزاي سايباه كده، وبنتي قالتلي وزعلانة أنها سايبانا؟ يا شيخة ألحقي ابنك واحضنيه وشوفيه عايز إيه.
وأضافت: والله العظيم أبو بناتي قعد معايا في كافيه وحكالي على البنت المحترمة اللي عايز يتجوزها ومامته رافضة، طب أنتي مش عايزانا نرجع مانعة أنه يتجوز أي واحدة تانية ليه؟ بتذلي ابنك ليه؟ أبو البنات متجوزش بعد ما طلقني من 12 سنة، أنا وقفت مع ستات كتير بسبب ظلمهم، وأنا الوحيدة اللي عندي أولاد منهم.
وطالبت نهى مجدي، بكتابة مسكن الزوجية باسم طليقها، قائلة: أنا مش عايزة الشقة باسم بناتي عايزاها تبقى باسم أبوهم ونفقة محترمة والمدارس، وأنا مش هيكون ليا دعوى بيهم تاني، وهما مفيش عندهم ما يمنع من عدم دفع مصاريف المدرسة.
واختتمت: أنا عارفة أن الكلام ده هيبسطهم علشان جحودهم، عايزة أقول لهم اتقوا الله أنا تعبت من التفاصيل، أنا إنسانة عندي 38 سنة فين من كل ده، أنا بحس بالرضا والسعادة لما بناتي تبقى تمام.
