هشام حلمي بكر يرد على انتقاد الصورة العائلية في العزاء: الناس بتحزن بطرق مختلفة | فيديو
علق هشام حلمي بكر، على انتقادات الجمهور له وعائلته، بسبب التقاط صورة جماعية في أثناء عزاء والده الراحل، كما أكد أنه يحاول التخفيف على شقيقته الصغيرة، وأنه يعد غريبًا نوعا ما بالنسبة لها.
وقال هشام حلمي بكر، خلال لقائه مع القاهرة 24، في أثناء زيارته لقبر والده الراحل في أول جمعة له: كون إن في عيلة بتحب بعض ده ميقللش من حزننا، والصورة اتاخدت بعد ساعة ونص من ختام العزاء، لأن جتلنا حالة من الارتياح بعد ضغط شديد بسبب دفن والدي بسرعة، غير إن عيلتنا نادر لما بتتجمع مع بعض في مكان واحد.
هشام حلمي بكر: الناس بتحزن بطرق مختلفة
وتابع هشام حلمي بكر: الناس بتحزن بطرق مختلفة، ومينفعش نحكم على الناس من صورة ولا فيديو، وكان شيء محزن جدا اللي اتقال علينا، واحنا أهو جينا مع بعض لوالدي النهاردة وصلينا الجمعة وفطرنا، وخلينا نقول إن بالصورة دي إحنا كدبنا كل الكلام بتاع إن إحنا مش قريبين من بعض ومش قريبين من والدي.
هشام حلمي بكر: أنا غريب بالنسبة لأختي
أما عن تصريح هشام الأخير، بشأن دعائه هو وشقيقته الصغيرة لوالدهما بأن يأكل الجمبري والكباب في الجنة، قال: ده مكنش دعاء على قد ما كان تخفيف على بنته، أختي اللي كانت في حالة من الذهول، دي واحدة عندها 8 سنين وشافت كفن أبوها ورايحة تدفنه، كانت قاعدة جنبي في العربية وعينيها مركزة في اللا شيء، فـ أنا حاولت أتعامل معاها بسنها، واستعملت نوع من الدعابة معاها لأنها مش مستوعبة.
وأضاف هشام حلمي بكر: أختي لسه عندها عمر طويل ومعندهاش أب، ولسه هنشوف هتعمل إيه في حياتها، وفي يوم من الأيام إن شاء الله هقدمها لزوجها، ومش سهل إنها تسافر معايا أمريكا لأني بالنسبة لها غريب نوعا ما، وهي ليها أمها هنا، هي مش صنم وليها أحاسيس.
