بتشتمني ومفكراني بخونها.. عريس المحلة يكشف أسباب المشاجرة مع زوجته قبل إنهاء حياتها | تحقيقات
كشفت التحقيقات في قضية مقتل عروس المحلة على يد زوجها، عن وجود خلافات بين الزوجين، منذ لحظة زواجهما، وسابقة وقوع مشادات كلامية بينهما، ومشاجرات منذ زواجها عام 2022، حتى انتهت المشادة الأخيرة بمقتلها.
قضية مقتل عروس المحلة على يد زوجها
ويستكمل القاهرة 24 نشر أقوال عريس المحلة المتهم بقتل زوجته، والذي أدلى بالتحقيقات قائلا: روان شتمت والدتي وحصل مشادة بین روان ووالدتي وأخواتي ووالدي زعق مع حمايا فأنا صعب عليا شتيمة أمي فقولت لروان إنتي طالق.
وتابع عريس المحلة: قامت روان حادفة المفاتيح جت في والدي.. وبعدها أنا طلعت البيت عندي ووالدها طلع معايا وقعد يقولى مينفعش بنتي تطلق من أول شهر جواز كده، فقمت أنا سبته ونزلت الشارع فلقيت واحد صاحبي كلمني وقالي أنا اتفقت مع أبو روان إنها تراضي أهلك وانت تراضي أهلها وفعلا ده حصل.
وأضاف زوج المحلة المتهم بقتل زوجته في التحقيقات: فضلت مش قابل روان وشايل منها بعدها لحد ما راحت لأهلها وقعدت يومين عندهم ولقيتها بتكلمني وبتقولي أنا حامل وبعدها روحت البيت عندها في بلقاس واتراضينا ورجعتها بيتها وفيه مشكلة ثانية حصلت قبل ما نختلف كنا اتخانقنا، بس أنا مش فاكر سبب الخناقة فلقيتها جرت على المطبخ وجابت سكينة وجت جري عليا عند رجلي وضربتني بالسكينة قطعتلي البنطلون لأنها ساعتها دخلت في حالة هياج عصبي وأنا راضيتها علشان بحبها.
وأكمل المتهم: بس هما دول أكبر مشكلتين حصلوا من أول الجواز بس كان فيه مشاكل غيرها كتير، وكانت بتشد معايا في الكلام وتشتم كثير لإني كنت بتأخر بره في الشغل وكانت مفكراني بتاع بنات وبخونها وكانت نقرها من نقر ابن خالتي شریكي في الشغل، محمد إبراهيم عبد السميع وعلى طول بتشتمني.
