سارة مجدي تكتب.. ربنا بابه مفتوح ومحدش معاه المفتاح

فاضل على رمضان 24 ساعة، وده أحسن شهر نطلع منه أحسن من جوه ومن برة.

من غير ما تحسبها كده الصيام بيحتاجه جسمك بجد وروحك.

علميًا فوائد الصيام:

١- يساعد على إزالة السموم من الجسم
٢-يريح الجهاز الهضمي ويساعد على الحفاظ على توازن السوائل في الجسم.
٣-أثبتت بعض الدراسات أن الصوم يساعد على علاج الالتهابات وبعض أمراض الحساسية والتهاب المفاصل والأمراض الجلدية مثل مرض الصدفية.
٤-يساعد الصوم على تكسير الجلوكوز مما يقلل إنتاج الإنسولين، وبالتالي يريح البنكرياس، مما يؤدي في النهاية إلى خفض مستويات السكر في الدم.
٥-يساعد على حرق الدهون.

فكده جمعت أهم الحاجات اللي بيستفيد منها جسمك وهو صايم.. نيجي لروحك بقي..

اللي ناوي بداية جديدة مع ربنا وبدأ يصلي كل فروضه وبعدين بيبدأ يصلي الصلاة في وقتها وبيقرا قرآن..

لو سمع حد بيقوله “انت دخلت الأسلام؟” 
“انت هتستشيخ؟” 
“انت هتعملي شيخ/ شيخة؟”
متزعلوش ولا تحطوا في دماغكم وردوا اه هنستشيخ عادي.. ربنا بابه مفتوح ومحدش معاه المفتاح.

انت قلبك بيستريح بقربه من ربنا وبالصلاة ومش عيب انك تلاقي رمضان باب للطاعة وانك تبدأ تقرب مش عيب ولا حرام؛ الحرام انك تلاقي شخص بيعمل الحاجة الصح وتتريق وتهزر، لو مش عايز تشجعه.. سيبه في حاله.

لو أقبل القلب على الله شعر بطعم العبادة والتذ بها وأنس بها وابتهج القلب بها. كما كان النبي صلى الله عليه وسلم يقول: "وجعلت قرة عيني في الصلاة".
وكان يقول لبلال: أرحنا بها يا بلال.