متهم في قضية توكيلات أحمد الطنطاوي: تأكدت إن السيستم واقع لكن المؤيدين جم على القهوة عشان استمارة بديلة| تحقيقات
كشفت التحقيقات في قضية أحمد الطنطاوي و21 من أعضاء حملته الانتخابية، والتي قضت فيها محكمة القاهرة الجديدة بحبسهم سنة وكفالة 20 ألف جنيه لإيقاف التنفيذ، أن المتهمين ادعوا شعبيته بتوكيلات مزورة، وشككوا في الانتخابات الرئاسية.
متهم بقضية توكيلات أحمد الطنطاوي
وحصل القاهرة 24 على التحقيقات في القضية التي حملت 19336 لسنة 2023 جنح المطرية والمقيدة برقم 2255 لسنة 2023 حصر أمن الدولة العليا، ووجهت جهات التحقيقات للمتهمين تداول أوراق تخص الانتخابات دون إذن السلطات المختصة، عبر دعوة المواطنين لتوقيع توكيلات شعبية وانكر المتهم م. أ اتهامه بتزوير توكيلات لصالح المرشح أحمد الطنطاوي قائلا: دخلت جوه عند موظف التوثيق وسألت عن السيستم شغال ولا لا ووقتها الموظف عشان يرفع عن نفسه أي حرج وراني أن السيستم واقع ولما خرجت من المكتب رحت قعدت على القهوة اللي قدام مكتب توثيق الإيمان وجالي وقتها على القهوة محمد.ع، وأيمن.م، وأيمن ساعتها كان معاه 50 إلى 60 نسخة مطبوعة من استمارات التأييد محمد. ع ساعتها طلب مني أتوجه معاه بعربيته عشان أخد منه نسخ من الاستمارة احتفظ بها في عربيتي عشان لو احتاجنا نوزعها.
وأضاف المتهم: فعلًا أخدت منه كمية من الاستمارات تقريبًا ممكن يعملوا حوالي 300 استمارة وسيبتهم في عربيتي ورجعت تاني على القهوة قعدت مع أيمن، وبعدها كلم أيمن ناس على تليفون الحملة بيستفسروا عن مكانه وأن هما عاوزين يعملوا استمارات تأييد فأيمن وصف لهم مكان القهوة وجم وقتها ثلاثة شباب أخدوا استمارات وملوها بخط أيديهم في القهوة اللي إحنا قاعدين عليها وكان معاهم صور البطايق بتاعتهم وأخدنا منهم الاستمارات دي ولما مشيوا صورت الاستمارات الثلاثة دوول في صورة واحدة بتليفوني لأن أيمن وقتها قالي إن عدسة تليفونه بايظة ولأننا كنا عاوزين نصور الاستمارات ديه ونحطها على صفحة الفيس بوك الخاصة بحملة السويس لتشجع الناس وكتبنا لها عنوان "بداية الغيث قطره"، وبعدها كان كلمني عربي صديقي وفي نفس الوقت عضو في حملة أحمد الطنطاوي.
وواصل المتهم: عرفت منه في التليفون أنه راح مكتب توثيق الإيمان عشان يعمل توكيل بس قالوله إن السيستم واقع برضه فقرر أنه يجيلنا على القهوة عشان يعمل استمارة تأييد وفعلًا عربي جيه على القهوة وملأ الاستمارة بخط أيده وبصم عليها وطلب مني إني اصوره مع الاستمارة وساعتها عربي كان لابس تيشرت أصفر وصورته كذا صورة وبعتهم له على الماسنجر وبعدها أيمن نزل صورة عربي باستمارة التأييد علس صفحة الحملة على الفيس بوك وبعد عربي عملنا استمارتين تانيين لواحد ومراته ونظرا لأننا كنا قاعدين على القهوة فاللي جالنا الراجل بس وزوجته فضلت مستنية في العربية والراجل هو اللي ملى الاستمارتين بخط أيده ووقع على الاستمارة اللي باسمه وراح لزوجته في العربية وخلاها توقع على الاستمارة بتاعتها وبعدها بحاجة بسيطة بدأ أيمن ميبقاش على بعضه كل شويه يقوم ويقعد لحد لما قالي إنه هيروح يجيب واحد من على أول الشارع وبمجرد ما هو قام من هنا لقيت الشرطة بتقبض عليا من هنا.
وأكمل المتهم: الكلام ده كان حوالي الظهر تقريبًا وكانوا حوالي خمس أفراد تقريبًا من قسم الأربعين ومسكوا صور الاستمارات اللي كانت في شنطة أيمن اللي كانت محطوطة قدامي على التربيزه في القهوة وبعدها الظابط سألني على عربيتي وروحنا هناك وفتحت له العربية وأخد نسخ الاستمارات اللي كانت فيها وأخدوا مني تليفوني والعربية كان فيها شنطة كروس فيها محفظتي وكان فيه مبلغ 2500 جنيه تقريبًا في تابلوه العربية ودول أنا معرفش موقفهم أيه، وبعدها طلعوا بيا على قسم الأربعين وطلعوني الدور الثاني في الطرقة وهناك طلبوا مني افتح لهم التليفون بتاعي حوالي الساعة 4،30 العصر تقريبًا نزلوني ركبت في عربية لقيت موجود فيها علي.ر بتاع المكتبة والعربية دي طلعت بينا على جهات التحقيق في القاهرة وهو ده كل اللي حصل معايا.
واختتم المتهم: أنا كل اللي كنت عاوزه أني أمارس السياسة بصورة قانونية في الإطار القانوني وكان المفروض عليا إني أثق في إحساسي أن موضوع استمارات التأييد دي اللي هكتبها خارج التوثيق فكرة مش كويسة وفكرة مقلقة وعشان كدة أنا بلغت أيمن أن آخر يوم شغل ليا في حملة أحمد الطنطاوي هيبقى يوم 2023/10/14 اللي هو آخر يوم في توكيل الترشيح عشان أنا شخصيًا مش ضامن الناس المؤيدين لأحمد الطنطاوي ممكن يعملوا أيه لو ما دخلش الانتخابات وممكن ينزلوا الشارع وأنا عن نفسي ليا إطار قانوني وسقف سياسي لا اتعداه، وأنا أتعلمت من الموقف اللي أنا فيه ده درس وكل طموحي حاليًا أني أحافظ على وظيفتي وأخرج لأسرتي وبناتي ووالدتي اللي أنا برعاها.
