بعد الجدل.. الإفتاء تكشف كيفية تقدير قيمة زكاة الفطر بطريقة سهلة وبسيطة
أوضحت دار الإفتاء المصرية، كيفية قيمة زكاة الفطر، التي حددتها 35 جنيها كحد أدنى، بعد جدل دار حول المبلغ الذي حددته.
الإفتاء تكشف كيفية تقدير قيمة زكاة الفطر بطريقة سهلة وبسيطة
ونشرت دار الإفتاء عبر حسابها على موقع التواصل الاجتماعي فيس بوك: اعرف دار الإفتاء المصرية قدرت قيمة زكاة الفطر إزاى بطريقة سهلة وبسيطة وميسرة، ولغة عامية أيضا سهلة وبسيطة.
وأضافت الإفتاء: حسبناها على القمح اللي هو نوع من الأنواع المذكورة في سنة سيدنا رسول الله صلى الله عليه وآله وسلم والخاصة بزكاة الفطر، بالإضافة إلى أنه غالب طعام المصريين بيتعمل منه، والعيش اللي هو وجبة أساسية وكمان بيدخل في أطعمة كثيرة جدًا.
وتابعت: طيب سعر أردب القمح كام السنة دي 2000 جنيه مصري من أحسن الأنواع، وأردب القمح فيه 150 كيلو، يبقى سعر الكيلو كام 13.33 ثلاثة عشر جنيه وثلاثة وثلاثون قرشًا تقريبًا، طيب والزكاة أد إيه في القمح 2.04 كيلو، يبقى نضرب 2.04 كيلو * 13.33
يطلع الناتج 27.19 جنيه مصري.
وواصلت: ودار الإفتاء قالت إنه 35 جنيه يعني زودت كمان عن الحد الأدنى بشويه، و35 جنيه الحد الأدنى - يعني طلع أكتر من 35 جنيه لو معاك ودخلك يسمح لك، بس اللى مش هيقدر فأقل حاجة يطلعها عن الفرد 35 جنيه.
وأشارت: طيب أنا شايف إن 35 جنيه قليل مش هتعمل حاجة، يبقى تطلع ما ترضاه نفسك وتحس إنه له قيمة، لكن لا تقل عن 35 جنيه، ولا تلزم غيرك يطلع زيك لأن ممكن يكون غير قادر، متابعة: كمان تقدر تطلعها فلوس لا تشتري بها شيء؛ لأن بعض الناس مفكرة إن ناخد الفلوس نشتري بها أرز مثلا، لأ طلعها فلوس وربنا يتقبل منك.
واختتمت: كمان يجوز إخراجها من أول رمضان لحد قبل صلاة العيد، ولو ما عرفتش فلا مانع إنك تطلعها يوم العيد لحد غروب الشمس، ودا على مذهب الشافعية ومن وافقهم.
