تامر حبيب: أنا وربنا صحاب.. واتهزيت بسبب تصريحات إيناس الدغيدي
حل السيناريست تامر حبيب، ضيفًا على أحد البرامج التلفزيونية، وتحدث خلال اللقاء عن تفاصيل حياته الشخصية، وعلاقته بوالديه الراحين، وعلق على تصريحات المخرجة إيناس الدغيدي التي اتهمته بالشذوذ.
أبرز تصريحات تامر حبيب التلفزيونية
- أنا وربنا صحاب وبناخد وندي كتير، ودعاء الاستخارة أنا بقوله 150 مرة في اليوم.
- من فترة عملت عمرة لنفسي ونمت وعملت عمرة لأمي، وصليت قدام الكعبة وكنت محظوظ جدًا لأن الدنيا كانت زحمة، ووقعت عند الحجر الأسود وشوفت الموت.
- الصوفيين وبتوع الميديتيشن بيؤمنوا أن الرقص المولوية فيه تقرب من المولى.
- أنا كنت طول عمري تخين جدًا وأبويا كان عايزني أخس علشان صحتي، وكان بيقولي متخليش شكلك زي الشوال كده، وجابلي عربية وركنها في الجراج وقالي مش هتركبها غير لما تخس، ولومه عليا كان عاملي عقدة.
- كان عندي دايمًا إحساس داخلي أن أبويا من نوع البني آدمين اللي مبيعرفش يبين مشاعره، وده نوع نشفق عليه.
- أنا فهمت أبويا بعد ما مات من الوصية اللي كتبها، وهو كان متأكد أنه هيموت وتوفى وفاة أي حد يتمناها توفى وهو في الحج، وأنا وقتها حصلي لغبطة في دماغي، وكنت بقول مش المفروض الراجل ده شرير؟ وكنت بتسأل هو بيحبني ولا لأ.
- أبويا كان متأكد أنه هيسافر الحج ومش راجع، وهو كان كاتب جواب ميتفتحش إلا بعد وفاته، وفتحته ولقيت الإجابة على كل أسئلتي، ده واحد بيعشقني عشق، ولم كل أرصدة البنوك وحطها في حساب واحد وسابلي شيك علشان متعبش في التدوير على التركات والورث.
- أبويا في آخر سنة في حياته كنا أصحاب، وهو كان خايف أني أكون مش قد المسئولية، وكنت بحضن الورقة اللي سابهالي بعد وفاته.
- أمي هي ديني ومعبدي ولو أنا وصلت لأي حاجة في الدنيا فأنا مدين بيها لأمي.
- المخرجة إيناس الدغيدي نيتها كانت خير، وإتأزمت من كلامها واتهزيت من الهجوم بتاع الناس.
- أنا بكره الإزدواجية الرهيبة في المجتمع، والناس بقت قاسية جدًا ومش واخدين بالهم أن في ناس ممكن تموت من كلمة.
- موت أمي هي قمة المأساة في حياتي.
- لو رجع بيا الزمن هحقق أمنية أني أبقى أب، وعندي خوف طول الوقت من أني أعمل بني آدم وأكون مسئول عنه وأن شخصيته هتتكون في أول 4 سنين.
- أنا بحب نفسي حب غلط، وبقيت أقعد مع نفسي وأفهم نفسي.
