أبرز تصريحات محمد سامي: بخاف من الموت والمرض.. وقصة عفاف شعيب كلها كذب
حل المخرج محمد سامي، ضيفًا على أحد البرامج التلفزيونية، وتحدث خلال اللقاء عن حياته الشخصية وتفاصيل وفاة شقيقته بمرض السرطان، ومشواره الفني.
أبرز تصريحات محمد سامي التلفزيونية
- قصة عفاف شعيب كلها كذب، وأنا بحترم سنها لأنها ست كبيرة، وهي اتكلمت كلام كتير كله كذب، القصة الحقيقية أننا مرة كنا بنصور مسلسل آدم ونفس الوقت بيتصور جنبنا مسلسل اسمه دوران شبرا، والأستاذة عفاف استأذنت قالتلي أخويا تعبان ومسافرة أعالجه، قلتلها تمام.
- وأنا بصور بالصدفة كلمني صديق اسمه جوزيف قالي تعالى عدي عليا أنا بصور مشهد لـ عفاف شعيب، وعرفت أنها في إستوديو ورانا، وموضوع ضهرها ده محصلش.
- معنديش شهوة جمع المال وبشوف وهو تقييم للفنان لأني من أسرة غنية مش بسيطة، وعندي شهوات أهم من الفلوس وهي جمع الحيوانات وعندي فوق الـ 1000 حيوان.
- مبخفش من الحسد، ومبحبش فكرة الشيوخ يعني إيه أجيب شيخ يقرأ لي وأمي موجودة بتقرأ لي، معنديش مشاكل مع حد في المشايخ، لكن مبحبش أتكلم عن المشايخ ولا السياسيين، وعلاقتي بربنا بشوفه البديع الرحمن، لأنه خلق الحيوانات والألوان اللي أنا بحبها.
- بطلب من ربنا طلبات تضحك، زي لو عربيتي عطلت أقوله مشيها، وممكن وأنا بعمل مشهد بطلب من ربنا إنه يبقى تريند.
- عندي شراهة للنجاح، نفسي أموت ناجح ومش منسي، وبخاف من الموت جدًا ومن المرض، لأن عندي أختي ماتت سنة 2005 كان عندها سرطان وبعد ما خفت منه مرضت تاني وماتت.
- هي كانت صيدلانية وموهوبة جدًا في الكتابة والشعر، لو موجودة كنا هنبقى كومبو هي تكتب وأنا أخرج لأنها محضرتش وأنا مخرج، كانت مثقفة أوي وموهوبة أوي.
- أختي كانت بتتعالج برا في أمريكا من السرطان، وكان الدكتور يهودي، قال لأبويا مطلوب مبلغ ضخم ووالدي وافق، والدكتور قاله أنا بصراحة بقولك رقم كبير عشان ترفض.
- جربوا معاها كل حاجة حتى الحاجات الدينية زي بول الإبل في مرسى مطروح، لما راحت هناك رفضت التجربة ورجعت من مطروح ميتة في العربية.
- مرة حصل بيني وبين تامر حسني خلاف كبير والناس متعرفش الموضوع ده، وكنت بعدها مفتقده جدًا، لحد ما شفته صدفة وضحكنا لبعض، وقلتله مفتقدك جدًا في المكالمة الساعتين اللي نصها ضحك، لأنه أخف دم في العالم.
- أنا أكتر واحد اشتغل مع تامر حسني في الوطن العربي، عملت معاه إعلانات وكليبات ومسلسل، إزاي مفيش بيننا كيميا، وبعدين تامر دلوقتي مخرج زميل، وكله إلا تامر حسني، أنا عندي الوسط الفني في كفة وتامر في كفة.
- أنا كلمت تامر حسني لما اختلفت في وجهات النظر أنا وأنغام في مسلسل نسل الأغراب، وعملي أغاني قيمتها ملايين من غير ولا مليم، ونزل بات في الإستوديو كأنه مسلسل بطولته.
- عمرو سعد ممثل كبير جدًا وموهوب جدًا ولكن كل ما أجي اشتغل معاه متحصلش، والحظ بيبقى ضدنا مش عارف ليه.
- كتبت من المسلسل لحد دلوقتي حوالي خمس حلقات ومش هقدر أقول اسمه احترامًا للمنتج صادق الصباح.
