لسه بحبه.. هشام ربيع عن تصريحات بوسي: حصلتلى مشاكل في بيتي وهي عايزة تدمرلي حياتي
رد رجل الأعمال هشام ربيع، على تصريحات طليقته المطربة بوسي، والتي أدلت بها مؤخرًا في أحد البرامج التلفزيونية، وعبرت عن استمرار حبها له بالرغم من انفصالهما بعد أزمات كثيرة.
وقال هشام ربيع في تصريح لـ القاهرة 24: بوسي طالعة بتقول أنها لسه بتحبني طب متعرفش إن إحنا كعادات وتقاليد ومبادئ، إحنا انفصلنا وأطلقنا وكل واحد راح لحاله، طيب متعرفش أن بحبك دي تخرب بيت وده اللى حصل عندي فعلا حصل مشاكل عندي في بيتي، هل هي عايزة تخربي بيتي؟.
وتابع هشام ربيع: أنا معملتش حاجة لبوسي كل اللى عملته أني دافعت واتسجنت ودفعت ملايين عشان خاطرها، وفي الآخر طلعت ندلة ومش جدعة ومش عايزة تعترف بكده، يعني هي كمان ناكرة للجميل ليه اللف والدوران في كلامك بالبرنامج، بدأت أصدق كل الكلام اللى كان بيتقال عنك قبل كده بعد اللي عملتيه معايا.
واختتم هشام ربيع حديثه: موضوع بحبك دي تخرب بيت وفي أسرة وأولاد، طب ليه تدمريلي حياتي أنا عملت فيكي إيه، بقولك الله يسهلك إحنا في شهر كريم ومش عايز أتكلم في أي حاجة أكتر من كده مع إن عندى كلام كتير عايزة أقوله بس مينفعش عشان مخضش في أعراض ومدخلش في حاجات هخلى كل حاجة لوقتها ولكن الله يسهلها ربنا يهديها.
يذكر أنه وقع شجار بين بوسي ورجل الأعمال هشام ربيع في إحدى فنادق منطقة التجمع الخامس، في شهر ديسمبر الماضي، وأشار هشام ربيع خلال تصريحات خاصة سابقة لـ القاهرة 24 مؤخرًا، إلى أنه كان موجودًا في الفندق للاحتفال بعيد ميلاده برفقة أصدقائه، وتفاجأ بوجود بوسي في نفس الفندق من أجل عملها، قائلًا: مسلمتش عليها وقولتلها كنت متخيل إنك هتطلعي أجدع وتسألي عليّا، ردت قالتلي لا أنا بسأل عليك، مضيفًا: من هنا زاد النقاش بيننا.
