دعمه فنانون ومشاهير.. أول تعليق من صاحب استوديو مدحت بعد حريق مصدر رزقه: شوفت الحب في عيون الناس

أبدى مدحت عدلي صاحب استوديو مدحت، امتنانه الشديد لمشاعر الدعم التي لقيها، عقب تعرض الاستوديو الخاص به لحريق كهربائي ناتج عن ماس كهربائي، أدى لتلف كل المعدات والديكورات الخاصة بالمكان الذي عمل من أجله لسنوات.
 

تفاصيل فكرة استوديو مدحت

وقال مدحت لـ القاهرة 24: أول سنتين كنت بصور ببلاش، عشان كنت عايز الناس تعرفني، وتعرف شغلي، لأن الفترة الي اشتغلت فيها دي، الناس كلها كانت شغالة في التصوير فكنت عايز الموضوع يبقى مميز.

وأضاف: عشان كدة حبيت أعمل حاجة ترجع للناس الذكريات الجميلة، لأن أي حد كان بيجيلي الاستوديو وأسأله امتى آخر مرة دخلت استوديو؟، كانوا بيقولولي من سنين، أو مدخلتش خالص، أو دخلت إجباري عشان صور 4×6.

وأوضح مدحت بداية حبه للتصوير، الذي كان ناتجا من حب اختلاطه بالناس والتعامل معهم، بجانب رغبته في العمل بشيء يحبه أكثر من اهتمامه بالمقابل المادي، الذي سيعود عليه.

وأشار مدحت إلى أن فكرة المكان لم يكن هدفها تجاريا قط، بل كان هدفها إسعاد الآخرين، وإدخال الفرحة على قلوب الأطفال، فيقول: الناس كانت بتجيلي كتير جدا لدرجة أن مكنش عندي مكان استقبلهم، ومكنتش بنزل العنوان عشان مكنتش معتمد على السوشيال الميديا، كنت معتمد على تجارب الناس اللي جت ولمست روح المكان، وساعتها نقلوا التجربة لمعارفهم.

رفض مدحت للمساعدات من أشخاص مجهولة

ورفض مدحت المساعدات المقدمة له من أشخاص مجهولين بعد حادث الحريق، رغم إعجابه بتعاطف الناس لكنه أعتبر الأمر حملا ثقيلا لن يستطيع سداده، فيقول: أنا عايز ابقى على علم ومعرفة باللي بيساعدني عشان اقدر اردهاله تاني، الموضوع هيبقى تقيل، وهحسه دين عليا، مش عايز ابقى في الموقف ده.

علاقة استوديو مدحت بالوسط الفني 

وشرح مدحت علاقته بالوسط الفني، أنها جاءت بمحض الصدفة بعد زيارة البلوجرز له، وملاحظة الناس لعمله على السوشيال ميديا، مما دفع الفنان عصام السقا أن يزوره ويلتقط بعض الصور نظرًا لإعجابه الشديد بالفكرة، وبالتالي انتقلت الفكرة لزملاء آخرين في الوسط الفني الذين تأثروا بتجربة عصام السقا مع استوديو مدحت، ووعدوا بزيارة المكان عندما يعود للعمل مرة أخرى كالبداية.

يحكي مدحت عن الدعم الذي تلقاه، فيقول: أنا راضي بدعم الناس، ودي أكتر حاجة مخلياني عايز ارجع رغم أن شغفي راح، لأني فقدت كتير ومش قادر أرجع أبص على أي حاجة عملتها وراحت مني.

ثم اختتم حديثه قائلا: شوفت حب في عيون الناس وقد ايه عايزني أرجع لنفسي تاني، عشان كدة لازم ارجع، لأني مبقتش لوحدي فيه ناس معايا، وطبعا راضي بحكمة ربنا بس الموضوع جه في حاجة صعبة شوية.