أحمد عز: عندي فوبيا المرض بسبب أمي.. ومعرفش البنات بتحبني ليه
حل الفنان أحمد عز، ضيفًا على الإعلامي عمرو أديب، في بودكاست Big Time، وتحدث خلال اللقاء عن تفاصيل حياته الشخصية، وبداياته الفنية.
أبرز تصريحات أحمد عز بودكاست Big Time
- أنا عندي فوبيا المرض لأن أمي الله يرحمها ماتت وقبل ما تموت كنت عارف هي عندها إيه ومقولتش لأبويا وإخواتي وده كان طلبها.
- أمي كانت مدورة البيت عادي كانت بتروح تاخد الكيماوي من غير ما حد يعرف وترجع تطبخ في البيت عادي، وأنا كنت أقرب واحد ليها وقعدت شوفت مراحل دي وبعدها جالي اكتئاب.
- بقى عندي متلازمة خوف من المرض، وده بقى طبع عندي ومش هيروح ولكن بتأقلم.
- بحمد وبشكر ربنا على النعمة الكبيرة اللي أنا فيها، ربنا يكفينا شر المرض دي أكتر حاجة بخاف منها.
- أنا والله معرفش البنات بتحبني ليه، وحب الناس ده لو دفعت فيه ملايين وطلعت تعيط على السوشيال ميديا وتقول أنا بحبكم وأنا شقيان، مستحيل، أنا أبسط وأخيب في التعامل مما تتخيل.
- موضوع إن أنا كنت مستحلي نفسي عمل لي عطلة في بدايتي، وبقيت أعمل الحاجة اللي شبه الناس.
- أنا منظم أوي في المواعيد والوقت، وده الموروث اللي أخدته من أبويا.
- حياتي الشخصية متهمش حد، واللي يهم الجمهور أن أعمل فيلم ومسلسل وإعلان كويس.
- أنا بزعل جدًا لما بشوف الناس بتقول هي بتاكل وبتشرب وقاعدة فين، في رأيي ده مش صح، والناس لو شافت عيشتي هتزهق.
- أبويا مكنش شايفني هبقى ممثل لأنه كان شغال في البترول وفكر أني هكمل في الكارير ده، وأنا بدأت حياتي كـ ريسبشسنت في قندق موفمبيق الهرم لمدة سنة، وبعدين نقلوني مبيعات.
- وأنا عندي 25 سنة بقيت مدير مبيعات لمجموعة فنادق بمصر، وسنة 1995 كان مرتبي 7500 جنيه.
- كنت بشتغل موديل وجت إيناس الدغيدي جابتني أنا وهند صبري في فيلم مذكرات مراهقة، وسيبت الشغل في رمضان وقولت لأبويا وأمي أني سيبت الشغل قاموا وسابوا الأكل.
- روحت عملت فيلم مذكرات مراهقة وقعدت سنة ونص بعده مبيجيليش شغل، وأبويا كان بيحاول يضغط عليا وأصدر فرمان أن ماحدش يديني فلوس.
- من وأنا صغير كنت بمشي في الشارع أتفرج على الأفيشات وكنت بشوف نفسي فيها، لغاية لما ربنا أراد.
- الفلوس بالنسبة ليا أن أنا واللي حواليا القريبين مني نبقى عايشين مرتاحين وماحدش محتاج، وإخواتي لو عايزين عنيا هديها ليهم، وإحنا قريبين من بعض وساكنين جنب بعض.
- أول مشهد ليا اتعاد 5 مرات، وكان في ممثلين حواليا وكنت متوتر، وقولت أني عايز أمشي، مهندس الصوت قالي أنا رأيي أنك متشتغلش وأرجع للفنادق تاني.
- كنت وحش جدًا ولكن الأستاذ خدني على جنب وقالي أنت هتبقى حاجة بس اصبر.
- عملنا خناقة مع تايسون فيوري وضربنا في فيلم ولاد رزق 3، وما شاء الله عليه لو واحدة بس لبست الفيلم مش هيكمل، هو صعب.
