أبرز تصريحات كريم عبد العزيز: والدي رفض دخولي الفن.. وبتمنى أعدي من قدام الكاميرا مع عادل إمام
حل الفنان كريم عبد العزيز، ضيفًا على أحد البرامج التليفزيونية، وتحدث خلال اللقاء عن تفاصيل مشواره الفني، بجانب الكشف عن أمنيته بالعمل مع الزعيم عادل إمام.
أبرز تصريحات كريم عبد العزيز التليفزيونية
- أنا اتولدت في بيت مخرج، أنا أبويا المخرج محمد عبد العزيز، وعمي المخرج عمر عبد العزيز، وابن عمتي المخرج محمد ياسين، فأنا نشأت في بيت مخرج.
- أنا درست في مصر وسافرت أدرس طيران في أمريكا، واكتشفت أن أنا إنسان لا يصلح للغربة، وأنا مش بتاع غربة وقررت أرجع مصر أدخل معهد السينما قسم إخراج.
- والدي كان رافض أني أدخل المجال الفني، وكان عايزني أدخل سياسة واقتصاد وأنا أصريت أني أدخل معهد السينما، ووالدي اعترف بعدين.
- والدي اعترض أني أمثل ومثلت واعترف بعدين، ووالدي علمني كل حاجة في حياتي، علمني الدنيا والفن والالتزام، وعمري ما زعلته ولكن أنا كنت شقي وأنا صغير.
- بعد تخرجي بشهر كلمني صاحبي وأخويا مروان حامد، وقالي بابا الأستاذ وحيد حامد، داخل فيلم مع الأستاذ شريف عرفة وعايز وجه جديد في فيلم اضحك الصورة تطلع حلوة، للعظيم الراحل أحمد زكي، واتاخدت على طول في الأدوار ملحقتش.
- في فيلم المشبوه الأستاذ عادل إمام ربنا يديله الصحة والعمر أستاذنا ومعلمنا وهو أبويا التاني، كان بيعمل فيلم مع والدي وطلب منه أني أكون في الفيلم، وكمان مع العظيمة سعاد حسني.
- كنت رايح فيلم المشبوه ومعرفش إنه تصوير، واتعاملوا معايا كطفل وكسرولي الرهبة والهالة بتاعة التمثيل والتصوير، ودوبوني في الفيلم وسهلوا عليا الموضوع.
- أنا كان نفسي أتمنى أني أمثل مع الأستاذ عادل إمام ولو أعدي من قدام الكاميرا كده، وكنت أتمنى أشتغل معاه لما كبرت، هو تاريخ وأسطورة وأبويا التاني.
- لما بيجيلي السيناريو بقرأ السيناريو كله كقصة مش دوري، وهل الأحداث مشوقة وسريعة، وتاني قراءة بتكون دوري.
- أنا محظوظ أني اشتغلت مع أساتذة كبار وعظماء علموني الفن، وأنا بعتبر أن ربنا كرمني في بداياتي وحطني مع ناس كبيرة جدًا.
- عملت مشهد فيلم البعض يذهب للمأذون مرتين وكان عندي 3 سنين، قبل ما أشتغل مع الأستاذ عادل إمام وأنا عندي 4 سنين في المشبوه، الوالد كان مظبطني، كانوا عايزين عيل يجري في التصوير.
- عرضنا فيلم ولاد العم لـ الجالية العربية في نيويورك، وسافرت مع المنتج وشريف منير، وحصل حالة من الجنون في نيويورك وفوجئنا بعمدة نيويورك باعت لجنة تتفرج على هذا الفيلم.
- والفيلم اتشال من السينمات وكان حروب غريبة، وهناك معقل اليهود، واللي ولع الدنيا كان حرق شريف منير في الآخر وعمل لهم حالة صعبة جدًا.
- فيلم بيت الروبي اترجم تركي وكان أول فيلم مصري يتعرض في تركيا بعدد السينمات دي.
- أنا شايف أن الفن بخلاف التسلية فيه توعية، يعني في جيل طالع لا يعلم أن مصر كانت مستعمرة، التوعية زي اللي بنعمله السنة دي في الحشاشين.
- دكتور بيتر ميمي عنده شيء صعب في الفن، وهو تبسيط الفن.
