بيتر ميمي يخرج عن صمته ويرد على منتقدي الحشاشين
خرج المخرج بيتر ميمي عن صمته ليرد عن منتقدي مسلسل الحشاشين، خاصة فيما يخص شخصية حسن الصباح وكذلك استخدام اللهجة العامية في المسلسل.
وكتب بيتر ميمي علي صفحته بفيس بوك: طيب كل سنة وانتم طيبين.. مع أنى مكنتش حابب أتكلم علشان دول كلهم 4 حلقات!
مبدئيا المسلسل من وحي التاريخ وده مكتوب نصا فى التترات يعنى مش وثيقة تاريخية لكنه دراما تاريخية.. هو تارنتينو لما قتل هتلر فى السينما كان حقيقة؟ او نابليون فى فيلم ريدلى سكوت الاخير هل ده نابليون اللى فى كتب التاريخ؟ ديه دراما تاريخية.. حاولنا نعمل خيال تصويرى لفترة من الفترات لكن فى شكل درامي.. لكن رجعنا فى الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه افلام او مسلسلات عالمية…
وأضاف هل ده حسن الصباح؟ مفيش كتاب اتفق على حسن الصباح لأن المغول حرقوا القلعة وكتبه وأفكاره والمجهود اجتهاد… ماركو بولو او فلادمير بارتول او برنارد لويس او فرهاد دفترى… وكتير جدا.. حسن الصباح كان بيعمل معجزات؟ لا طبعا!!! وده تباعًا مع الحلقات هيتفهم
وتابع: الحشاشين مسلسل تاريخي بالعامية المصرية.. الأحداث بيت أتراك وفرس.. لما عملوه الأتراك اتكلموا تركي ولما عملوه الأمريكان بيتكلموا إنجليزي.. إحنا عاملينه فى مصر والترجمة موجودة فى كل بلد.. المسلسل بيتعرض فى روسيا وأمريكا وأكتر من بلد كل بلد بلغتها..هم الڤيكنجز كانوا بيتكلموا انجليزى؟ ولا ويليام والاس كان بيتكلم اللكنة الامريكية.
وتابع: ليه حسن الصباح؟ حسن الصباح شخصية فذة وغريبة ومستفزة أنك تعرف عنها.. مش لازم يكون رمز للخير علشان يتعمله مسلسل.. هتلر وراسبوتين كانوا في منتهى الشر لكنهم شخصيات فذة غيرت العالم.. أو على مستوانا المصري خط الصعيد أو سفاح إسكندرية
حاجات صغيرة،
- أم الخليفة رصد كانت نوبية الأصل
- اسكندرية مدينة فى مصر.. لان فى مدن كتير باسم اسكندرية حوالين العالم.. لزم التوضيح للترجمة لان فيه غير مصريين بيتفرجوا على المسلسل
- مجاعة القاهرة الفاطمية مثبوتة تاريخيا لكن تعددت اشكالها حسب المصادر وهى على فكرة كانت قبل وصول حسن بفترة مش بعيدة بس ديه دراما (من وحي التاريخ)
- ماتسمى بمعجزات حسن الصباح مقصود تتصور بالشكل ده وده هيبان تباعا وخصوصا مشهد الراوي حلقة ٨
- عم ملك شاه اتقتل بوتر القوس لان ده كان عرف وتقليد
مين الست اللى بتظهر لحسن الصباح؟ ده فى حلقة ٣٠ بقى لو ربنا ادانا عمر..
كل سنة وانتم طيبين وسعيد أن المسلسل خلاكم تقروا وتسألوا.. وشوية شوية هتفهموا المسلسل.. صحصحوا معانا كده يا شباب خلونا نعمل شكل جديد.. وتبقى بداية ومع الوقت يتعمل لأفضل وأكبر وأحسن من اللى إحنا عاملينه.. ومع الوقت ننافس …
