شريف سلامة: الناس لو شافت حياتنا الحقيقية مش هتصدق أعمالنا.. ومبيهمنيش الانطباعية
حل الفنان شريف سلامة ضيفا على برنامج ألبوم صور، مع إيناس سلامة الشواف عبر محطة راديو إنرجي 92.1 ضمن خريطة برامج رمضان 2024.
وقال شريف سلامة، إنه يحب الخصوصية في حياته موضحًا: بحب يبقى مسموح للناس يشوفوا شغلي وشخصياتي ويصدقوها.. لكن أنا ضد السوشيال ميديا والناس تشوف حاجاتي الشخصية.
وأردف شريف سلامة: احنا فنانين بنقدم وعي ومسئولية كبيرة، وهنفقد المصداقية والناس مش هيصدقوا شخصياتنا لو عرفوا حياتنا الحقيقية.
وكشف شريف سلامة عن جانب هام في شخصيته قائلا: مش بحب أجمل الكلام واللي بحسه بقوله ولا بحب استخدم فلتر في حياتي.
وأوضح شريف سلامة أنه يسير على عدد من القواعد الهامة في حياته، قائلا: أنا مبعملش حاجة عشان حد أبدا.. ولو الصورة بتاعتي وصلت غلط لحد بيبقى واجب عليا لو شاف الأمور بشكل مخالف للواقع بوضحله.. لكن لو هو مصمم يشوف نفس وجهة النظر هو حر.
وأكد شريف سلامة أن الصورة المرسومة له من الناس حقيقية موضحا: أنا شخص مسالم وحقيقي.. والأحكام المسبقة ده كلام فاضي، ميهمنيش الانطباعية وبشوف إن نقل الخبرة في التعامل ده جهل..أنا بتعامل مع الناس بصفتهم الوقتية وتعاملهم المباشر.
وأشار إلى أن أهم حاجة في الوجود أن الشخص يتواجد وسط مقربين يكون قادرا على الحديث معهم بطبيعته، موضحا: مبحبش الشخص اللي بيلف ويدور وبحب الوضوح.
