مها أحمد: مرض ابني بسبب خطأ طبي.. وهسمع منه كلمة ماما في الجنة اللي ربنا وعدني بيها
تحدثت الفنانة مها أحمد عن تفاصيل الأزمة الصحية التي يمر بها نجلها أحمد، مشيرة إلى أن سبب مرضه هو خطأ طبي، وأن أصحاب ذو الهمم يحتاجون إلى عناية خاصة.
وقالت مها أحمد في تصريحات تليفزيونية: أحمد ابني من ذوي الهمم، والسبب في اللي حصله كان دكتور عمل خطأ طبي، ومقاضيتش الدكتور لأنه مش هيرجعلي مخ ابني لأنه نقص أكسجين.
وأضافت مها أحمد: السبب وأنا بولد أن الدكتور شده بالشفاط، وبعدها خرجني ولدت قيصري، ولو كنت قلت ساعتها عمرهم ما هيقولوا الحقيقة اللي حصلت جوه أوضة العمليات، وهو بالنسبالي الحياة، وممكن ربنا يكون عمل كده عشان أدخل الجنة أنا وجوزي من غير ما نتعب في الدنيا.
مها أحمد: لما كان ابني بيرجّع كنت بدوق الترجيع
وأكملت مها أحمد: ابني لحد دلوقتي تعبه متعة وراحة بالنسبالي، أنا مش بعيط عشان أحمد كده، ولكن أحمد مالوش ذنب في كده، أنا لما كان ابني بيرجّع كنت بدوق الترجيع، عشان طريقة الدوا كده فبدوق عشان أعرف ده الدوا ولا لأ لأن دي سموم.
وتابعت مها أحمد قائلة: وأنا نازلة لازم احكيله ولو ضحك بعرف أن كده الموضوع اللي هعمله هيمشي، وأنا أي مكان بروحه باخده معايا ومجدي جوزي بيروح يشوف مكان مناسب عشان يبقى ينام فيه.
مها أحمد: لو جالي شغل في منصة هشتغل وأنا دخلت الجنة وأنا في الدنيا
وواصلت مها أحمد: اللي الناس متعرفوش إني كل سنة بدخل بيه المستشفى عشان عنده نقص حديد، ومحدش يعرف حاجة غير أهلي، وعمري ما طلبت لا من النقابة ولا أي حد فلوس، ولا سعيت أني اجيبله معاش زي ما الرئيس السيسي عامل للأطفال ذوي الهمم، ولو بتاجر بابني كان زماني في كل بلد شوية.
واختتمت مها أحمد حديثها قائلة: هفضل أشتغل على تيك توك، ولو جالي شغل في منصة هشتغل، وأنا دخلت الجنة وأنا في الدنيا، مش بعيط عشان اللي حصل لابني ولا أنه معيوب، لو من عند ربنا عادي لكن لما يبقى خطأ طبي ده اللي بيزعل، وأنا في الجنة هسمع منه ياماما وهجوزه في الجنة وربنا وعدنا بكده، ولكل أم ابنها كدة اصبري هتشوفي هيبقى إزاي في الجنة.
