متهم في قضية رشوة شركة مياه أسوان: كنت زي الغريق وعايز أنقذ المليون جنيه| فيديو
قضية رشوة شركة مياه أسوان.. شهدت جلسة استماع هيئة المحكمة إلى أقوال المتهم الثالث قضية رشوة شركة مياه أسوان، تفاصيل كثيرة، إذ أدلى المتهم (عمرو. م. ن) 38 سنة، محاسب وممثل قانوني للجمعية التعاونية للإنشاء والتعمير بمحافظة أسوان بأقواله.
وقال المتهم أمام المحكمة: أنا شغال في الشركة من 13 سنة وسمعتي كويسة، وفي يوم المهندسه هبة كلمتني وقالتلي إن يحيى (المتهم الأول) رشحني أمسك عملية، اشترينا مواسير بأكتر من مليون جنيه وأجرنا مخازن ومعدات علشان نشتغل بناء على تكليف المتهم الأول يحيى، وهبه كلمتني قالتلي يحيى بيقولك اطلع بره الموقع خالص ملكش شغل هنا، رحت الشركة علشان أعرف في إيه، تفاجئت بإن مانعين أي حد من التعامل معايا، حاولت أوصل للمتهم الأول يحيى معرفتش.
وأضاف: كلمني محمد المتهم الثاني، وقالي المتهمة السادسة راندا هتحل كل المشاكل اللي عندك وأنا كنت زي الغريق، وعايز أنقذ المليون جنيه اللي دفعتها، كلمت راندا وقالتلي نقلت طلب للمتهم الأول مبلغ 3 ملايين و250 ألف رشوة في العملية علشان يمكني من الموقع ولو وافقت هتدخل المكتب موافقتش مش هدخل الشركة خالص، اضطريت أوافق علشان أنقذ المليون جنيه اللي دفعتها في المواسير.
قضية رشوة شركة مياه أسوان
وتابع: قولتلها إن موافق ادفع الرشوة للمتهم الأول، بعد كده طلبت من راندا تتوسط عند المتهم الأول يحيى علشان أخد عملية في أسوان، وبلغتني يحيى عايز مليون جنيه رشوة مقابل أن يسند العملية لجمعيتي ومحل عملي طلبت تخفيض لنص مليون جنيه وقالتلي إن يحيى موافق على العرض.
وكانت قررت محكمة جنايات شمال القاهرة المنعقدة بالعباسية تأجيل محاكمة رئيس مجلس إدارة شركة مياه الشرب والصرف الصحي بأسوان، في القضية المتهم فيها بطلب والحصول على رشاوى مالية قدرها 8 ملايين و50 ألف جنيه وسيارة ماركة أودي لجلسة 21 مارس لاستدعاء للشهود.
