حلا شيحة: بنجذب للرجالة المتدينة.. ومبحبش أجلد نفسي
أكدت الفنانة حلا شيحة، أنها تنجذب للرجال المتدينين، ولكن ليسوا هم سبب ارتدائها الحجاب، موضحة أن التقرب إلى الله ليس بالشكل والحجاب على حد قولها.
وقالت حلا شيحة، في تصريحات تلفزيونية: في مرحلة ما انجذبت للرجالة المتدينة، وأبو أولادي أنا بحبه أوي من وأنا صغيرة، ولما اختارته كان علشان تدينه وأنه بيقولي هنصلي ونقرأ قرآن مع بعض، بس فيه ناس بتقول كل ما تتجوزي بتتحجبي، وأنا حبي للحجاب مالوش علاقة بحد، وقربي لحد متدين بيشجعني ألبس الحجاب.
وتابعت حلا شيحة: قربي من ربنا سعادة كبيرة في حياتي، ولكن مش بالشكل والحجاب، وبقالي سنة تفكيري اتغير في التقرب من ربنا، ولما وقفت على رجلي اتعلمت إني مش لازم أجلد نفسي بزيادة واللي أنا حاساه أعمله، ولو ربنا قدرلي حاجة هشوفها.
حلا شيحة مقدرش أحرم الفن
وسبق وتحدثت الفنانة حلا شيحة عن حرمانية الفن، مؤكدة أنها تفكر في الأمر من ناحية الشكل وليس الحرمانية، قائلة: فيه حاجات ممكن أقول أن لا يصح أنها تكون موجودة، مش لازم الأحضان الكتيرة أنا مؤمنة بـ ده، لكن مقدرش أحرم الفن، والسينما زمان كان وقتها غيرنا وكلاسيك، يعني الأجانب يعملوه، لكن إحنا بيطلع شكله مش حلو، وأنا بفكر في الموضوع من ناحية الشكل مش الحلال والحرام.
