مادة حارقة.. ننشر تحقيقات تعدي اليوتيوبر أكرم سلام على سيدة بالمقطم| خاص
يواصل القاهرة 24 نشر التحقيقات في القضية التي حملت رقم 1694 لسنة 2024 جنح المقطم، والمتهم فيها اليوتيوبر أكرم سلام وآخرين بالتعدي على سيدة بمنطقة المقطم، بسبب خلافات على أرباح فيديوهات اليوتيوب.
اليوتيوبر أكرم سلام
واستمعت جهات التحقيق لأقوال المجني عليها نجلاء عطا. م. م 41 سنة مقيمة بالمقطم، قائلة: الكلام ده حصل يوم 28/1/ 2024 حوالي الساعة 4 مساء من بيتي في عمارة 2 من ميدان النافورة المقطم، وقتها أنا كنت راجعة من السوق وبركن عربيتي وطالعة البيت، وكان معايا ابني الصغير.
وتابعت المجني عليها بالتحقيقات: أنا بعد ما ركنت عربيتي وندهت على البواب لقيت حد بـ ينده، وبيقول يا نجلاء، ولسه بلف عشان أشوف مين بـ ينادي لقيت حد رش حاجة فوشي، والحاجة دي جت في عيني فمكنتش قادرة أشوف حاجة، وبعدين لقيت اللي بـ يضربني ومسكني من شعري وشدني لورا.
وأضافت: وعشان كدا انا محستش هو ضربني كام ضربة بس هو كان ماسك شعري وأنا بحاول أجري منه، بس أنا مكنتش حاسة بحاجة من كتر الحرقان اللي في عيني، وكمان عورني في إيدي بآلة حادة، بس أنا معرفش إيه هي لأني مكنتش شايفة من اللي اترش في عيني.
وأكملت المجني عليها بالتحقيقات: وأنا وقتها لقيت كل الناس اللي في الشارع اتلمت وجريت وراه وهو جري منهم بعربية كانت واقفة وفيها ناس تانية وأول ما ركب هربوا بسرعة، وبسبب الضرب اللي اتعرضتله حصلتلي إصابة بجرح قطعي في إيدي الشمال وخيطوا الجرح 18 غرزة، ومتعورة في الصباع الأوسط لا يدي اليمين وخيطت الجرح بأربع غرز ولما روحت حسيت بكدمات في راسي وظهري واجعني.
وأردفت: وبعد كده أنا روحت للدكتور اللي أنا بتابع معاه يوم 11 فبراير 2024، وعرفت إن أنا حصلي إجهاض وأن الجنين اللي في بطني مات، لأني كنت حامل في الشهر الثالث، والدكتور سألني لو كنت شيلت حاجة تقيلة، بس أنا وقتها محكتلوش اللي حصل.
وأشارت المجني عليها بالتحقيقات، وبسؤالها عن وجود خلافات بينهم؟ أجابت: انا معرفش إبراهيم بس اعرف اكرم ويوسف وياسين أولاده وليلي انا اعرفها لما تواصلت معاها عشان تمسك لي قناة اليوتيوب بتاعتي، وبعد كده حصل بينا خلافات بسبب قناة اليوتيوب بتاعتي وانا لقيت أكرم بعتلي ناس كسرولي عربيتي.
من جانبها قررت جهات التحقيقات المختصة، حبس اليوتيوبر أكرم سلام وآخرين، 45 يوما على ذمة التحقيقات، لاتهامهم بالاعتداء على السيدة وإصابتها بمنطقة المقطم التابعة لمحافظة القاهرة، بسبب خلافات على أرباح فيديوهات اليوتيوب.
