لقاء الخميسي: مفيش حاجة اسمها نقاب أو خمار والحجاب مش فرض.. وربنا مصادرش رأيي
علقت الفنانة لقاء الخميسي على الهجوم الذي تعرضت له بعد كشفها رأيها وانتقاداها للحجاب، مؤكدة أنها تفهم معاني القرآن جيدًا، وأن الحجاب والنقاب ليس فرضا على حد قولها.
وقالت لقاء الخميسي، في تصريحات تلفزيونية: أنا ست قرأت القرآن وذاكرته وعارفة معانيه، وشايفه من وجهة نظري أنه مفيش حاجة اسمها نقاب أو خمار، ومعنى وليضربن بخمرهن على جيوبهن، الجيوب هي المنطقة المقفولة اللي هي الصدر، وده اللي أنا مذكراه وفهماه.
وأضاف لقاء الخميسي: أنا من حقي أقول رأيي، لأن ربنا مصادرش رأيي، وشايفه إني أقول رأيي مش لازم أطلع غلطانة، وربنا مفرضش النقاب، والحجاب كمان، لكن احترم المحجبات هما حرة، وهما اختاروا كده.
وأكملت: الإنسان يكون حر لحد ثقافته واختياراته وأفكاره، وموجة المثلية الجنسية أو تغيير الهوية لما تكبر مش حرية، إلا إذا فيه عيب طبي هو اتخلق بيه، لكن عمال على بطال لأ، وهما يتحملوا مسئولية ده، ولو ابني جه قالي هساكن واحدة مش مقبول وهرفض، وشايفة إني أربي صح وأعلم القرآن.
لقاء الخميسي: زميلة أخدت مني أهم دور مع محمود عبد العزيز
كما علقت الفنانة لقاء الخميسي على خسارتها فرصة أمام الساحر محمود عبد العزيز، قائلة: كان هيبقى فيلم مهم وعلامة في حياتي مع محمود عبد العزيز لكن زميلة اخدته مني بعد ترشيحه ليا.
واختتمت: كان فيه مشاهد جريئة كنت هرفضها وهيبقى ليها حلول، وفي حاجات اتعملت مش لازم تتعمل بالطريقة دي، ومش بالضرورة المشاهد تتعمل بالمنطق ده، كنا هنقعد ونتكلم، وزعلت جدًا، لكن ربنا عوضني في راس الغول.
