ناهد السباعي في تصريحات تلفزيونية: مصر كلها عايزاني أتجوز.. ونفسي دنيا سمير غانم تعمل قصة حياة هدى سلطان
حلت الفنانة ناهد السباعي ضيفة برنامج نجوم رمضان أقربلك، تقديم الإعلامية إنجي علي، المذاع على نجوم إف إم، وخلال لقائها كشفت كواليس مشاركتها في مسلسل محارب، إلى جانب حديثها عن والدتها الراحلة ناهد فريد شوقي، وغيرها من الأسرار.
نستعرض لكم في هذا التقرير أبرز تصريحات ناهد السباعي الإذاعية:
_-فيلم يوم للستات أهم دور عملته في حياتي.. وأخدت جوائز كتير بسببه.
-أهلي زمان كانوا بيصرفوا على الفن من بيوتهم وفلوسهم.. وجدي هو اللي عمل معهد فنون مسرحية.
-مفتقدة في مجال الفن اللي اتربيت عليه من أهلي، لأنهم شايفينه مهم وبيقدسوه.
ناهد السباعي: والدتي سيبالي رسائل في كل ركن في البيت
-بحس أن ماما بتكلمني.. وكان عندها كرسي بتحب تقعد عليه، إن الذي فرض عليك الحب لردك لمن تحب ولو بعد حين.
-اكتشفت إن أمي سايبة لي رسائل في كل ركن من البيت قبل وفاتها.
- مسلسل محارب التعاون الثالث بيني وبين حسن الرداد وبحب أشتغل معه ووشنا حلو على بعض.
-أنا مجنونة وبحب شغلي..وقدمت مشهد القفز من البلكونة في مسلسل محارب من أول مرة.
-قفزت من ارتفاع 20 متر فى محارب.. ومش هكرر تجربة القفز مرة تانية لأنه زيرو أمان.
ناهد السباعي: فريد شوقي غير قوانين كتير في المجتمع
-القلم اللي أخدته من الفنان محمود البزاوي في مسلسل محارب مش حقيقي.. والمخرجة أظهرته بشكل رائع.
-مسلسل هبة رجل الغراب عمل لي قاعدة جماهيرية كبيرة خاصة من الأطفال.
-كان نفسي أقدم رواية بيت القبطية للأستاذ أشرف العشماوي.
-أنا بحب الحيوانات جدا وقعدت فترة طويلة أدعم الجمعيات الخاصة برعاية الحيوانات.
- نفسي أعمل حاجة لتغليظ القوانين ضد الأشخاص اللي بيعذبوا الحيوانات.
-لما والدتي كانت عايشة كان نفسها أتجوز، وبعد وفاتها مصر كلها بتحبني وتطالبني بالجواز، الموضوع أصبح مطلب جماهيري.
- أنا ووالدتي مررنا بإحساس الفقد سوا، وشقيقي توفى في حادث سيارة فجأة، والدي دخل المستشفى بعدها بشهرين وتوفى.
-من وأنا صغيرة والتراجيديا في حياتي.. ومفيش حد هيكون عندي أغلى من اللي راحوا.
-والدتي كانت بتحب الأدوار التي تعيش ومهمة في تاريخ الفنان، وخلتني بحب السينما واحترمها وأحاول أثقف نفسي فيها.
- في حاجات عرفتها من الشباب اللي بيقدموا محتوى على السوشيال ميديا مكنتش أعرفها.. اتمنى إنتشار النوع ده من المحتوى.
-لا يمكن أجسد شخصية جدتي هدى سلطان، هي كانت بيضاء وشعرها أصفر وأنا سمراء.
-دنيا سمير غانم هي أكتر واحدة ممكن تقدم شخصية هدى سلطان، لأنها شاطرة ومغنية صوتها رائع وتقدر تقدمها بشكل أفضل.
-تجسيد شخصية جدي فريد شوقي لا يمكن حد يقدر يقدمها صعب.
-والدتي حاولت تقدم السيرة ذاتية لجدي وعرضت الدور على عدة نجوم وخافوا من تقديمها.
-عائلتي احترموا تاريخهم وفنهم وكانوا يقدمون فن وثقافة يغيروا بها قوانين، وهي حاجات في ميزان حسناتهم.
-جدي بسبب فيلم كلمة شرف غير قانون خروج السجين لرؤية أهله.
