حاتم صلاح: الكبير أوي نجحني وخلاني موجود بالوسط الفني.. وأحمد مكي أعطاني مساحة كبيرة |حوار
للعام الثالث على التوالي، يستطيع الفنان حاتم صلاح تحقيق نجاح مبهر مع عرض مسلسل الكبير أوي بشخصية نفادي، والتي أضاف لها هذا العام بشكل كبير خلال موسمه الثامن؛ من خلال لزمات وإفيهات كثيرة، وخاصة مع ظهوره بمساحة أكبر مقارنة بالموسمين السابقين.
وأجرى القاهرة 24 حوارًا مع حاتم صلاح، والذي حدثنا عن شخصية نفادي في العمل، وماذا أضاف للشخصية في الموسم الثامن، وكذا تعاونه مع أحمد مكي وأمينة خليل وغيرهما، وإلى نص الحوار:
*حدثنا عن دور نفادي هذا العام في مسلسل الكبير أوي 8؟
مسلسل الكبير أوي 8 ممكن يكون آخر موسم له، لذلك حاولنا نقدم حاجة لطيفة وعملنا مجهود أكبر، وأستاذ أحمد الجندي أضاف للشخصية وقدم أمينة خليل ضيفة شرف للمسلسل، وقدمت معها دويتو جيد، وحاولنا نطور الشخصية ونلعب على اللزمات اللي ما كانتش مستغلة السنين السابقة زي الشعر.
*ولماذا الشعر؟
فريق العمل بتاعي في حد منهم بيعرف يكتب شعر وكان بيساعدني وبنكتب مع بعض، وحاولنا نلعب على اللزمات، والحمد لله الناس اتكلمت بشكل كويس وحبت الإفيهات.
*وهل كانت الإفيهات مكتوبة في الإسكربت أم ارتجالية؟
بيكون فيه اسكربت عن السيناريو والموقف، لكن الكوميديا شغل الممثلين والمخرج في اللوكيشن؛ فبنرتجل كتير، والإسكربت في الكوميدي 50 أو 60%، لكن الباقي ارتجالي.
*حدثنا عن لوك شخصيتك في المسلسل؟
كنت بفكر أعمل لوك مختلف شوية، لكن أحمد الجندي قال لي خلينا بنفس اللوك لإن الناس متعودة عليه كده وبتحبه وواخدين عليه كده، وإنت ممكن تكون زهقت بس الناس حابة تشوف الشخصية زيي ما شافوها أول مرة.
*وكيف ترى التعاون مع أمينة خليل؟
أمينة خليل شخص متواضع لطيف ومتعاون لأبعد الحدود وسعيد بالتعاون معاها، وعلى المستوى الشخصي بحبها وبشوفها نجمة مهمة ومسلسلاتها مهمة، وبشوفها نجمة درامية مهمة جدا، وكنا قلقانين إنها تستغرب الضحك بتاعنا، لكنها كانت لذيذة وبتهزر.
*وكيف ترى التعاون مع أحمد مكي.. ماذا استفدت منه؟
بحبه جدا وبعتبر نفسي صاحبه، واستفدت منه في إنه لما بيشتغل كوميدي عنده روح الفريق، وممكن تلاقيه في مشهد واقف ساكت، والمسلسل اللي بطولته إحنا واقفين بنقول وهو بيفرش ويساعد، وفي وقت تاني العكس، بنتعامل كفريق، وبنروح ننبسط علشان نقدر نبسط الناس وده اللي بيهتم به الجندي وأحمد مكي، وده اللي شايفه مهم في الكوميدي، ومش شرط علشان بطل العمل هو اللي يعمل ويقول كل حاجة، لكن مكي مدينا مساحة كبيرة جدا، وده اللي مخليني ساعات برفض حاجات كتير، لأنك ممكن تخاف تشتغل مع نجوم أقل من مكي ما يدوكش نفس المساحة، ومكي بيتعامل كفرد من الفريق ممكن كلنا نفكر في جملة، علشان حد بيقول حاجة حلوة.
*إلى أي مدى ساعد الكبير أوي في نجاحك وشهرتك؟
بالطبع، ساعد في نجاحي بشكل كبير، وهو يعد بالنسبة لي النجاح الأكبر وعرفني بالناس وخلاني موجود في الوسط الفني، وناس كتير بيكلموني في أدوار، وفي السينما بيتر ميمي ساعد في نجاحي من خلال فيلم شلبي مع كريم محمود عبد العزيز، وبعدها رشحني في مسلسل على باب العمارة لأنه المنتج المنفذ للعمل، وهي دي الخطوات اللي خلتني ليا أهمية في الوسط الفني، لكن الكبير أوي هو اللي حقق نجاحي بشكل أكبر لأن المسلسل صاحب أكبر قاعدة جماهيرية في الوطن العربي، علشان كده النجاح الأكبر ليا من خلاله، وفي النهاية كانوا عاملين 5 مواسم قبلنا، وكانوا مكسرين الدنيا، وإحنا نفسنا كنا من جمهورهم وفجأة بقينا معاهم وأبطال معاهم، وحاولنا نضيف للعمل علشان نكون قد المسؤولية، لأننا داخلين مع كوميدينات مصر ومكسرين الدنيا، وعاوزين نثبت نفسنا، وكلهم ساعدونا ومكي وأحمد الجندي ليهم الفضل إننا نكون موجودين، ومش مجرد ناس بتسند، ولكن كأبطال.
*هل تتمنى تقديم مواسم أخرى من مسلسل الكبير أوي؟
ممكن يكون الموسم الأخير لمدة 3 أو 4 سنين، وأتمنى نرجع نقدمه وإحنا عندنا خمسين سنة؛ لأن الناس مرتبطة به في رمضان، وممكن نكون محتاجبن نغير والناس تشوفنا في أعمال جديدة.
*حدثنا عن أجواء مشاهدتك للمسلسل مع أسرتك؟
بنتفرج عليه وبضحك معاهم، لأن في مشاهد ما بكونش شفتها وبضحك زي المتفرج.
*هل فكرت في غلق فرق أسنانك؟
أنا معنديش أزمة شخصيا من ده، لكن لو هي كانت هتعطلني في أدوار معينة هقفلها، ولو حسيت إنها هتحصرني هقفلها، لأني مش عاوز أتحصر في دور معين، والممثل لازم يكون بيعمل أي حاجة وأي دور لو الشكل مطالب هعملها.
